Аввал мазкур йўлнинг қарама-қарши томонида капитал таъмирлаш ва янги асфальт қопламасини ётқизиш ишлари якунланган эди. Энди эса ишлар йўлнинг иккинчи томонида давом эттирилиб, юқори сифатли асфальт қопламаси ётқизилади.

Шу муносабат билан 2026 йил 6 август соат 23:00 дан 10 август соат 08:00 гача Кичик ҳалқа автомобиль йўлининг Бунёдкор шоҳ кўчаси билан кесишмасидан Арнасой кўчаси билан кесишмасигача бўлган таъмирланаётган қисми транспорт воситалари ҳаракати учун вақтинча ёпилади.

Таъмирлаш ишлари давомида автотранспорт воситалари оқими йўлнинг қарама-қарши томонига йўналтирилади ва ҳаракат тасдиқланган вақтинчалик схема асосида ташкил этилади.

Шунингдек, тез тиббий ёрдам хизматининг махсус автотранспорт воситалари учун алоҳида вақтинчалик ҳаракат йўналиши ташкил этилади.

Мутасаддилар ҳайдовчилардан йўл белгиларига қатъий риоя қилиш, тезликни пасайтириш ҳамда ҳаракат йўналишини олдиндан режалаштиришни сўрамоқда.

Қайд этилишича, вақтинчалик чекловлар йўлни сифатли капитал таъмирлаш, янги асфальт қопламасини ётқизиш ва ишларни хавфсиз якунлаш мақсадида жорий этилмоқда. Шу муносабат билан фуқаролардан юзага келиши мумкин бўлган вақтинчалик ноқулайликларга тушуниш билан ёндашиш сўралди.