Бу ҳақда Адлия вазирлиги маълум қилди.
Вазирликка Буюк Британиянинг «Cambridge University Press & Assessment» компаниясига тегишли «IELTS 20 Academic», «Mindset for IELTS», «Complete IELTS», «Essential Grammar in Use» ва «English Grammar in Use» китобларининг контрафакт нусхалари сотилаётгани юзасидан мурожаатлар келиб тушган.
Мурожаатларни ўрганиш давомида фуқаролар Й.X., M.A., Н.Д. ва Ш.Ш. томонидан мазкур ўқув қўлланмаларининг ҳуқуқ эгаси рухсатисиз тайёрланган нусхалари сотилгани аниқланган.
Ҳуқуқбузарларга нисбатан Маъмурий жавобгарлик тўғрисидаги кодекснинг 177¹-моддаси билан маъмурий ҳуқуқбузарлик тўғрисида баённомалар расмийлаштирилиб, судларга юборилган.
Суд қарорлари билан уларга ушбу модданинг биринчи қисмига мувофиқ жарима жазоси тайинланган.
Адлия вазирлиги муаллифлик ҳуқуқи билан ҳимояланган асарларнинг контрафакт нусхаларини сотиш ҳуқуқ эгаларининг қонуний манфаатларига зарар етказишини эслатди.
Муаллифлик ҳуқуқи бузилган ижодкорлар Адлия вазирлигининг 1008 ишонч телефони ёки info@adliya.uz электрон почта манзили орқали мурожаат қилишлари мумкин.
