Дар рейтинги Solo Travel Index 2026 коршиносон 26
кишварро бо назардошти тамоюлҳои бронкунӣ, баррасиҳо ва таҷрибаи сайёҳон, сатҳи
амният аз рӯи Global Peace Index, осонии гирифтани раводид, арзиши ғизо ва
нишондиҳандаҳои гуногунии биологӣ арзёбӣ кардаанд.
Ӯзбекистон дар як қатор бо чунин самтҳои машҳури сайёҳӣ,
ба монанди Италия, Ҷопон ва Португалия, ҷой гирифтааст.
Муаллифони рейтинг афзоиши таваҷҷуҳи сайёҳони амрикоиро
ба Ӯзбекистон пас аз ҷорӣ шудани низоми 30-рӯзаи бидуни раводид барои шаҳрвандони
ИМА таъкид мекунанд. Аз ҷумлаи бартариҳои кишвар мероси бойи таърихӣ, табиати
гуногун ва инфрасохтори рушдёфтаи сайёҳӣ номбар шудаанд.
Ба имкониятҳои истироҳати фаъол ва мустақилона таваҷҷуҳи
махсус дода шудааст. Сайёҳон метавонанд дар кӯҳҳои Нурото аз як қишлоқ ба қишлоқи
дигар пиёда сафар карда, бо тарзи зиндагии сокинони маҳаллӣ шинос шаванд, аз
пайроҳаҳои қадима гузаранд ва шабро дар юртаҳои анъанавӣ гузаронанд.
Ҳамчунин сафари дигар тавассути биёбони Қизилқум ба сӯи кӯли
Айдаркӯл ҳамчун масири ҷолиб зикр шудааст. Ин сафар имкон медиҳад, ки шиносоӣ
бо табиати минтақа бо таҷрибаҳои ғайриодии сайёҳӣ якҷо карда шавад.
Дар рейтинг ба мероси фарҳангии кишвар низ таваҷҷуҳ
шудааст. Регистони Самарқанд, Бухоро ва дигар шаҳрҳои бостонӣ таърихи бойи Ӯзбекистонро,
ки дар чорроҳаи Роҳи бузурги Абрешим ҷойгир аст, нишон медиҳанд.
Муаллифони рейтинг таъкид мекунанд, ки кишвар сайёҳонро
на танҳо бо масирҳои таърихӣ ва саргузаштӣ, балки бо арзиши нисбатан дастрасии
сафарҳо низ ҷалб мекунад. Қаблан маҷаллаи Condé Nast Traveler низ Ӯзбекистонро
ба қатори самтҳои дастрастарини ҷаҳон барои саёҳат дохил карда буд.
