Маҳалла фуқаролар йиғини раиси, ҳоким ёрдамчиси, нуронийлар ва қишлоқ аҳли билан самимий суҳбатлашди.
Мулоқотда андорхонликлар ҳудуднинг “ўсиш нуқтаси” қовунчиликни ривожлантириш эканлигини маълум қилдилар. Чунки, МФЙда 845 тадан зиёд хонадонлар бўлиб, қадимдан қовун сақлаш сирларини ўзлаштириб келгани сабаб аҳоли 70-80 фоиз хонадонларда қовунчилик билан шуғулланади.
Сақлаш жойларида бўрикалла, қирқма, умрбоқий, кампиртўн ва бошқа навдаги қовунлар сақланади. Қишлоқ аҳли асосан, Жиззах ва Сирдарё вилоятларида деҳқончилик қилади. Шириндан шакар қовунларни сақлашда қишлоқ ҳудудининг географик жойлашуви ҳам муҳим аҳамиятга эга. Ҳудуднинг ўзига хос шамоли ва сақлаш жойлари қовунларни ҳатто май ойигача сақлаш имконини беради.
Қишлоқдаги Шариповлар хонадонида бўлган вилоят ҳокими оила даромади билан қизиқди. Хонадон вакиллари бир йилда 1 гектар ердан сарф-ҳаражатлардан ташқари 20 млн сўмдан ортиқ даромад қилишини айтишди.
93 ёшли отахон Шамсиддин Исомиддинов ҳам меҳмонларни ўз уйга таклиф қилиб, хонадонда сақланаётган қовунларни кўрсатди.
Андархон қовунларидан таътиб кўрган вилоят раҳбари бундай ширин қовунларга хорижликлар, хусусан, японияликлар ҳам катта қизиқиш билдиришганини таъкидлади.
Тегишли вилоят ҳамда туман мутасаддилари билан биргаликда барча амалий чора-тадбирларни белгилаб, қовунчилик кластерини ташкил этиш бўйича топшириқ берилди.