Покистон ҳарбийлари чоршанбага ўтар кечаси Ҳиндистон билан халқаро чегарада ўт очишни тўхтатиш тартибини бузди, деб хабар бермоқда Ҳиндистоннинг ANI ахборот агентлиги ҳарбий манбаларга таяниб.
“Кеча эрталабгача Покистон армияси фақат назорат чизиғи бўйлаб ўт очишни тўхтатиш режимини бузган бўлса, ҳозир улар Жаммудаги Парагвал секторида тунда халқаро чегара бўйлаб ўт очиш орқали халқаро чегаралар бўйлаб ўт очишни тўхтатиш режимини бузган ҳолда вазиятни янада кескинлаштиришди”, дея маълум қилди манбалар. Парагвал сектори Ҳиндистон иттифоқи ҳудуди саналадиган Жамму ва Кашмирнинг Жамму округида, назорат чизиғидан жанубда жойлашган. У Ҳиндистон ва Покистон ўртасидаги расман тан олинган халқаро чегара бўйлаб жойлашган.
Аввалроқ Ҳиндистон қуруқликдаги кучлари 29 апрелдан 30 апрелга ўтар кечаси Покистон қўшинлари иттифоқ ҳудуди саналадиган Жамму ва Кашмирнинг Наушера, Сундербани ва Ахнур секторлари қаршисидаги назорат чизиғи бўйлаб ўқотар қуроллардан асоссиз ўқ узганини маълум қилган эди. Ҳиндистон ҳарбийлари мамлакат армияси зудлик билан ва мутаносиб жавоб берганини маълум қилди.
Жамму ва Кашмирда 26 кишининг ўлимига сабаб бўлган терактдан сўнг Нью-Деҳли ва Исломобод ўртасида кескинлик кучайиб, Ҳиндистон-Покистон чегараси ҳудудида бир ҳафтадан бери ўт очишни тўхтатиш режими бузилиши қайд этилди, деб хабар беради tass.ru.
