— Ўзбекистон узоқ йиллар давомида инвестицияларни жалб этиш нуқтаи назаридан «вакуум ичида» эди. Энди Ўзбекистонда иқтисоднинг эркинлашув жараёни кечаётган бир пайтда инвестициялар янги бозорга ёпирилиб кириб борди. Apple ҳақида сўзлайдиган бўлсак, унинг учун янги бозорлар керак эди. Улар Қозоғистонни эгалланган, ўзлаштирилган бозор ҳисоблайди. Бизда ҳатто талабаларда ҳам Appleнинг сўнги моделидаги телефонлар. Янги моделнинг пайдо бўлишида Apple компанияси учун рекламага ҳожат қолмайди — фуқароларимиз уларни ҳар хил йўллар билан сотиб олади: Америка ва бошқа мамлакатлардан олиб келади — деб тушунтирди Қозоғистон ташқи ишлар вазири ўринбосари Алмас Айдаров.
Ундан ташқари, деб таъкидлади Айдаров, Қозоғистон Россия билан ягона иттифоқда. У ерда эса Appleнинг катта офиси ҳаракатда. Шундай экан, икки мамлакат ўртасида товарлар қўшимча солиқларсиз алмашинади.
— Бу масалада Apple учун биз эгалланган бозормиз. Ўзбекистоннинг бозори эса Apple учун ҳали ўзлаштирилмаган. У ерда кўпроқ Samsung ишлаб чиқарган телефонлар. Ўзбекистоннинг танлангани мана шу билан асосланади, — деб хулоса қилди Айдаров.
У шунингдек, инвестициялар жалб этиш учун ҳозир трансмиллий компаниялар билан музокаралар олиб борилаётгани, улар орасида Siemens компанияси борлигини таъкидлади. Мазкур компания ТИВ вакили сўзларига қараганда, «Қозоғистонда аллақачон хизмат кўрсатяпти, лекин ишлаб чиқариш базаси йўқ».
Аввалдан маълумки, Nike, ADIDAS, Apple каби жаҳондаги машҳур брендлар, шунингдек, кийим-бош ва уй учун товарнинг чакана савдоси бўйича пешқадам бўлган Испаниянинг INDITEX компанияси Ўзбекистонда ишлаб чиқаришни йўлга қўймоқчи. Сўнги бир ярим йил ичида бир неча йирик корпорациялар Ўзбекистонда солиқ тўловчи сифатида рўйхатдан ўтган. Булар жумласига Netflix, Google Commerce, Google Ireland, Google Voice, Samsung Electronics, Сleverbridge, Xsolla, Activision Blizzard International киради. Ўтган йили апрелда ушбу рўйхатга Apple Distribution International ҳам қўшилди, деб хабар қилади Orda.kz.
