Азиз Воитов ва Венгрия қишлоқ хўжалиги вазири ўринбосари Шандор Фаркаш билан учрашув давомида ҳамкорликни ривожлантиришнинг янги йўналишлари муҳокама этилди. Жумладан, Венгрия томони рақамлаштириш, давлат харидлари тизими, субсидиялаш, нарх-навони шакллантириш, сув ва ер ресурсларидан самарали фойдаланиш, аграр секторни суғурталаш каби соҳаларда тажриба ва ишланмалар билан бўлишишга, шунингдек, Ўзбекистон томонини ғалла етиштиришнинг маҳаллий технологияси, ғаллачилик хўжаликлари ва қайта ишлаш корхоналари фаолияти билан таништиришга тайёр эканини билдирди. Томонлар ихтисослашган мутахассисларни жалб қилган ҳолда қишлоқ хўжалиги соҳасида ҳамкорлик бўйича қўшма ишчи гуруҳ платформасини яратишга келишиб олдилар. Илк учрашувни 2022 йил охирига қадар ўтказиш режалаштирилди.
Томонлар Ўзбекистон Президентининг ташрифи доирасида имзолаш учун салмоқли ҳужжатлар тўпламини тайёрладилар. Уларда боғдорчилик, иссиқхона хўжалиги, картошкачилик, узумчилик, балиқчилик, шунингдек суғурта, аграр фан ва таълим соҳаларида ҳамкорликни ривожлантириш бўйича барча қўшма режалар белгилаб берилган.
«Венгрия уруғчилик, боғдорчилик, балиқчилик ва бошқа йўналишларда ўзининг етакчи илмий-тадқиқот ишлари ҳамда тажрибасига эга бўлиб, инвестиция лойиҳаларини биргаликда амалга ошириш учун истиқболли ҳамкор ҳисобланади. – дея таъкидлаб ўтди музокаралар чоғида Азиз Воитов. – Бугунги кунда Ўзбекистон-Венгрия ўртасида илм-фан соҳасидаги ҳамкорликнинг ёрқин натижаси сифатида Тошкент вилояти АКИС марказидаги Картошкачилик марказини кўрсатиб ўтиш мумкин. 2021 йилда унинг базасида Ўзбекистон тупроқ-иқлим шароитида Венгрия картошкасининг олтита нави синовдан ўтказилиб, 760 килограмм ҳосил олинган эди. Олти навдан бештаси истиқболли нав сифатида Давлат реестрига киритилган. Жорий йил май ойида 52 минг мини туганаклар Тошкент вилоятида Сабзавот, полиз экинлари ва картошкачилик ИТИда кўпайтириш учун экилди, ўзбек-венгер марказининг ўзида эса ушбу навларнинг in vitro усулида вируссиз кўпайтириш ишлари ташкил этилди».
Томонлар Ўзбекистон-Венгрия марказига келгуси йилда ишга туширилиши режалаштирилган молекуляр диагностика лабораториясидан самарали фойдаланиш бўйича ўқув дастурини ташкил этишда кўмаклашишга келишиб олдилар. Мазкур лойиҳани самарали амалга ошириш учун Венгрия қишлоқ хўжалиги ва табиий фанлар университети (МАТE)ни бош маслаҳатчи этиб тайинлаш таклиф этилди.
Азиз Воитовнинг Венгрия қишлоқ хўжалиги ва табиий фанлар университети (МАТE) ректори Чаба Дюрич билан учрашуви худди шу куни Капошвар шаҳрида ушбу ОТМ томонидан ташкил этилган қишлоқ хўжалиги ярмаркаси ва «Қишлоқ туманларини ривожлантириш бўйича анжуман» вақтида ўтказилди.
МАТE Венгрия ва Марказий Европадаги энг йирик қишлоқ хўжалиги университети ҳисобланади. У 2000 йилда иккита ихтисослаштирилган ОТМни интеграция қилиш йўли билан ташкил этилган ва бугунги кунда Будапешт, Дёндёш, Капошвар ва Кестхеяда кампуслари бор, шунингдек, 11 та илмий-тадқиқот институтларига эга. ОТМда 16 522 талаба (2 234 нафар хорижий) таҳсил олади, ўқитувчи профессорлар таркиби эса 985 нафар ходимдан иборат. 45 та академик дастурлар инглиз тилида олиб борилади.
Учрашув давомида Венгриянинг МАТE университети ва Марказий Осиёдаги энг йирик ҳисобланган Тошкент давлат аграр университети ўртасида академик ҳамкорлик тўғрисидаги меморандум имзоланди.
Ҳужжат қўшма таълим дастурларини амалга ошириш, қўшма лаборатория тадқиқотлари ҳажмини кўпайтириш, механизация, узумчилик, боғдорчилик, озиқ-овқат хавфсизлиги ва бошқа йўналишларда билим, мутахассислар ва талабалар алмашинувини таъминлашга хизмат қилади. Шунингдек, бу АКИС ҳузуридаги Картошкачилик маркази негизида Ўзбекистон-Венгрия ҳамкорлигини янада такомиллаштириш имконини беради, деб хабар беради Қишлоқ хўжалиги вазирлиги матбуот хизмати.
