Мутахассислар таъкидлашича, чақалоғини эмизадиган аёлларда сут безлари хавфли ўсмаси камдан-кам ҳолларда учрайди. Агар чақалоқни эмизиш жараёни сабаб саратон эҳтимоли камайса, бунда қандай механизм ишлайди, деган савол туғилади. Тиббиёт тили билан айтганда хавфли ҳужайраларнинг олдини олишга иммунитет жавоб бериши керак. Яъни иммунитет унинг олдини олиш лозим. Янада содда қилиб айтганда, кўкрак билан эмизиш иммунитет эътиборини сут безлари ҳолатига жалб қилиши керак.

Бола туғилишидан олдин она организми кўкрак сути пайдо қилиш учун қайта мослашиши керак. Чақалоқни кўкрак сутидан ажратганда организм аввалги ҳолатига қайтади. Организмдаги бундай қайта ўзгаришлар янги ҳужайралар пайдо бўлиши ва эскиларини йўқ қилиш жараёни билан бирга юз беради. Молекуляр-ҳужайра чиқиндисини йўқотиш эса иммун ҳужайралар иштирок этишини талаб этади. Чунки иммунитет бу жараён имкон қадар хавфсиз рўй беришига масъул. Бундан ташқари без ҳужайралари эмизиш давомида доим ҳалок бўлиб боради, айрим аёлларда эса туғуриқдан кейинги лактация мастити – сут безлари шамоллаши рўй беради.

Умуман олганда иммунитет ҳақиқатан организмнинг туғишдан олдинги қайта мослашиши, ўзгаришидан бошлаб эмизиш даврининг охиригача сут безларини диққат билан кузатиб бориши керак.

Чақалоқ она юрагига ёрдам беради

Илгари ҳам кўп эшитгансиз, ўқигансиз: кўкрак сутининг кўплаб фойдали хусусиятлари бор. Кўкрак сути билан боқилган болалар ёмон экологияга яхшироқ қаршилик кўрсатади, хавфли хасталикларга камроқ чалинади, кейинчалик семириб кетиш эҳтимоли камроқ бўлади. Бу ҳолат қолаверса оналарнинг ўзи учун яхши жиҳатлари оз эмас. Жумладан, Оксфорд университети тадқиқотчилари Хитой тиббиёт фанлари академиясидаги ҳамкасблари билан бирга Journal of the American Heart Association нашрида ёзишича, чақалоқни эмизиш аёлни юрак хасталигидан маълум даражада ҳимоя қилади, деб ёзади nkj.ru.