Таъкидланганидек, меҳнат миграцияси ҳажмининг ортиши, хорижда бўлиб қайтаётган фуқаролар сонининг кўпайиши ҳамда чет эл фуқароларининг Ўзбекистон Республикаси ҳудудига кириб келиши инсон саломатлиги учун хавф туғдирувчи юқумли касалликларни барвақт аниқлаш ва уларнинг тарқалишининг олдини олиш чора-тадбирларини кучайтириш заруратини юзага келтиряпти.

Ушбу қонун лойиҳаси инсон учун хавфли бўлган юқумли касалликларни олдини олиш мақсадида ишлаб чиқилган бўлиб, унда 90 кундан ортиқ муддатда чет элда бўлиб қайтган Ўзбекистон фуқароларини ҳамда меҳнат фаолиятини амалга ошириш учун мамлакатимизга келган хорижликларни тиббий кўрикдан ўтказиш назарда тутилмоқда.

Хусусан, узлуксиз тўқсон кун ва ундан ортиқ муддат давомида чет элда бўлиб қайтган ўн саккиз ёшдан олтмиш ёшгача бўлган Ўзбекистон Республикаси фуқаролари, Ўзбекистон Республикаси ҳудудида доимий яшайдиган чет эл фуқаролари ва фуқаролиги бўлмаган шахслар ҳамда меҳнат фаолиятини амалга ошириш учун республикамизга кириб келаётган чет эл фуқаролари ва фуқаролиги бўлмаган шахсларни мажбурий равишда ОИВга тиббий текширувдан ўтказиш белгиланмоқда.

Йиғилишда ташаббускорлар депутат Шерзод Қулматовнинг нима учун 90 кун белгиланаётгани масаласига изоҳ бераркан, бу юқумли касаллик инсон организмида 90 кундан сўнг ўзини намоён қилишини қайд этди. У шунингдек, чет элдан қайтган фуқаро агар ўзининг, оиласининг соғлигини ўйласа, тезда тиббий кўрикдан ўтиши лозимлигини билдирди.

Унинг билдиришича, мазкур ҳужжат инсон саломатлиги учун хавф туғдирувчи юқумли касалликлар тарқалишининг олдини олиш, аҳоли саломатлигини муҳофаза қилиш, меҳнат миграцияси жараёнларида ижтимоий хавфсизликни таъминлаш бўйича таъсирчан ҳуқуқий механизмларни шакллантиришга хизмат қилади.

Муҳокамалардан сўнг, қонун лойиҳаси депутатлар томонидан қўллаб-қувватланди.