Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари Бахтиёр Раҳмонов меҳмонларни самимий қарши олиб, уларнинг Ўзбекистон ва Тошкент билан ҳамкорлик қилишга бўлган қизиқишидан хурсанд эканлигини билдирди.
Бугунги кунда пойтахтда Жанубий Кореянинг Bomi Engineering&Construction Co Ltd компанияси Tashkent Cityъда, Evergreen Motors Group компанияси эса Сеул кўчасида йирик бизнес марказини бунёд этаётганини айтиб ўтди. Шунингдек, бошқа қатор Корея компаниялари ҳам турли соҳаларда фаолият юритаётганини қўшимча қилди.
Тошкент шаҳар ҳокимлиги Daewoo Construction Groupънинг пойтахт билан ҳамкорлик қилишга оид қизиқишидан мамнунлигини билдириб, шаҳримизда амалга оширилиши кўзда тутилаётган йирик лойиҳалардан бири билан таништириб ўтди. Пойтахтимизнинг Янгиҳаёт ва Бектемир туманларига тааллуқли бўлган ушбу лойиҳа турар жойлар, йирик савдо мажмуалари, саноат ҳудудини ва ижтимоий объектлар қурилишини ўз ичига олади. Меҳмонларга лойиҳа юзасидан тайёрланган видеоролик намойиш этилди ва уларни қизиқтирган саволларга жавоб берилди.
Ўз навбатида Daewoo Construction Group раиси Жунг Вон Жу дўстона қабул ва самимий муносабат учун миннатдорлик билдирди. Тошкентдаги ўзгариш ва янгиланиш жараёнларини, ўзбек халқининг меҳмондўстлигини алоҳида эътироф этиб, халқларимизнинг маданияти жуда яқинлигига тўхталиб ўтди. Бугунги кунда улар томонидан АҚШ, Вьетнам ва Филиппинда амалга оширилаётган йирик лойиҳалар – Smart cityълар борасида маълумот берди. Тошкент билан ҳам бу борада муҳим келишувга эришилса, ана шундай кенг кўламли замонавий лойиҳани амалга оширишга қизиқиш билдирди. Шунингдек, яна кўплаб Корея компаниялари Ўзбекистонга кириб келиб, инвестиция киритишини қўшимча қилди, деб хабар беради Тошкент шаҳар ҳокимлиги матбуот хизмати.
