Бу ҳақда Ўзбекистон Божхона қўмитаси хабар берди.

Қозоғистон Республикаси Молия вазирлиги Давлат даромадлари қўмитасининг маълум қилишича, «Тажен» (Ўзбекистон Республикасининг «Довут-ота» чегара божхона постига туташ) чегара ўтказиш пункти орқали жисмоний шахслар, енгил автомобиллар, автобуслар ҳамда рухсат этилган тўлиқ вазни 3,5 тоннадан ошмайдиган юк автомобиллари ҳаракати бўйича жорий йил 1 февраль санасидан киритилган чекловлар 2025 йилнинг 31 декабрига қадар узайтирилди.

Муддатнинг узайтирилиши мазкур ўтказиш пунктларида иккинчи босқич қурилиш ишлари, хусусан, маъмурий биноларда капитал таъмирлаш ҳамда йўл қопламаларида бетонлаш ишлари олиб борилаётгани билан боғлиқ.

Рухсат этилган тўлиқ вазни 3,5 тоннадан ортиқ бўлган юк автомобиллари «Тажен» (Қозоғистон) – «Довут ота» (Ўзбекистон) чегара ўтказиш пункти орқали ҳаракатни амалга оширишлари мумкин.

Қўмита жисмоний шахслар учун «Қорақалпоғистон» темир йўл ўтказиш пункти орқали «Нукус-Бейнеу» йўналишида қўшимча йўловчи поездлари қатнови йўлга қўйилганини билдирди.

Мазкур назорат-ўтказиш пунктлари орқали ҳаракатланиш постни реконструкция қилиш учун 1 февралдан уч ойга тўхтатилганди. Кейинроқ жараён 1 сентябргача узайиши маълум қилинганди.