Мамлакатимизда аниқ ва табиий фанларга қаратилаётган эътибор самараси ўтаётган ҳафтада Ўзбекистон ёшлари эришган ютуқлар тимсолида яна бир карра ўз исботини топди. Юртимиз вакиллари нуфузли мусобақалар сирасига кирувчи Халқаро математика (IМО), Халқаро биология (IBO), Халқаро физика (IPhО) олимпиадаларида муносиб иштирок этиб, совринли ўринларни эгаллади.
Беш йиллик танаффусдан сўнг
Математика чуқур мантиқий тафаккурни талаб этувчи фан сифатида яхши маълум. Шу боис, 62-халқаро математика олимпиадаси терма жамоасини шакллантириш жараёнида энг иқтидорли ёшлар саралаб олинди.
Шу йилнинг 14-24 июль кунлари Россия Федерацияси томонидан ўтказилган бу йилги беллашувда дунёнинг 110 давлатидан 623 нафар ўқувчи иштирок этди. Унда 6 нафар юртдошимиз Ватанимиз шарафини ҳимоя қилди. Онлайн ўтказилган мусобақа якунида Бухоро вилоятидаги 5-ИДУМ ўқувчиси Диёрбек Толипов кумуш, Бухоро вилоятидаги Халқаро математика мактаби ўқувчиси Олимжон Олимов бронза медалга муносиб топилди.
— Сўнгги беш йилда бирорта иштирокчимиз совринли ўринни қўлга киритмаган эди, — дейди терма жамоа раҳбари, В.И. Романовский номидаги Математика институти профессори Носир Ғанихожаев. — Шу боис, бир неча босқичли саралаш жараёнидан сўнг олти нафар ўқувчини танлаб, бир ойдан зиёд шуғулландик. Олдинги олимпиадаларда қатнашиб, билими чиниққан йигитқизлардан иборат жамоа тузилди. Улар орттирган тажрибаси билан бу йилги иштирокчиларни тайёрлашда фаол қатнашди. Ниҳоят, бир муддатлик танаффусдан сўнг вакилларимиз яхши натижа билан барчамизни хурсанд қилди. Мусобақа олтин медалига даъвогарлик чегараси 24 балл эди. Кумуш медаль олган вакилимиз 21 балл жамғарди. Олтин медалга борйўғи 3 балл етмай қолди. Ёшларимизнинг бу йилги ғалабасида Президентимизнинг аниқ фанларни ўқитишга эътибори яққол сезилди. Келгуси йилда бу кўрсаткичлар салмоғи янада ошиши шубҳасиз.
Иккита олтин — тарихда биринчи марта
Шу йилнинг 18-23 июль кунлари Португалия давлати томонидан ташкил этилган 32-халқаро биология олимпиадасида дунёнинг 76 давлатидан 304 нафар иқтидорли ўқувчи иштирок этди. Улар сафида 4 нафар вакилимиз ҳам муносиб қатнашиб, мамлакатимиз тарихида биринчи марта икки олтин, бир кумуш медални қўлга киритди. Жумладан, Жиззах давлат педагогика институти академик лицейи ўқувчиси Ҳумоюн Норбеков ва Тошкент педиатрия тиббиёт институти академик лицейи ўқувчиси Азиза Абдувалиева олтин, Навоий вилоятидаги 11-ИДУМ ўқувчиси Ёрқинбек Турдибоев кумуш медаль соҳиби бўлди.
— Илгари вилоят миқёсидаги фан мусобақаларида қатнашиб, совриндорлар қаторидан жой олганман. Академик лицейга ўқишга киргач, билимимни ошириш имконияти пайдо бўлди. Барча шартшароитларга эга таълим муассасасида тажрибали ўқитувчилар, қолаверса, хориждан жалб этилган мутахассислар кўмагида билимимни янада бойитишга ҳаракат қилдим. Мамлакатимизда таълимга қаратилган эътибор туфайли нуфузли халқаро олимпиадада биринчи ўринни эгалладим, — дейди Азиза Абдувалиева. — Албатта, бу мен эришган охирги ғалаба бўлиб қолмайди. Келгусида яна қатор халқаро даражадаги фан беллашувларида юртимиз шарафини муносиб ҳимоя қилиб, терма жамоамизнинг олтин медаллар жамғармасини бойитишимга ишонаман.
Физикадан ҳам натижа ижобий
Жорий йил 17-24 июль кунлари Литвада ўтказилган 51-халқаро физика олимпиадасида ҳам вакилларимиз совринли ўринлардан жой олди. Беллашувда дунёнинг 73 давлатидан 365 нафар иштирокчи қатнашди. 19 июль куни олимпиаданинг амалий қисмида иштирокчилар 2 та топшириқни бажарди. 21 июль куни эса, назарий босқичда 3 та масаланинг ечимини топиш вазифаси берилди. Якуний натижаларга кўра, Тошкент шаҳридаги 71-мактаб ўқувчиси Раил Хашаев бронза медални қўлга киритди. Олдинда юртдошларимизни яна бир муҳим воқеа кутиб турибди.
Шу ҳафта мамлакатимиз терма жамоаси Халқаро кимё олимпиадасида қатнашади. Ишонамизки, юртимиз ёш кимёгарлари ҳам нуфузли беллашувда билими ва салоҳиятини намойиш этиб, улуғ боболарга муносиб издош эканини исботлайди.
