Бу ҳақда Geo телеканали хавфсизлик кучларидаги манбаларга таяниб хабар берди.
Хавфсизлик кучлари қолган йўловчиларни озод қилиш операциясини давом эттирмоқда, жангарилар ҳужуми пайтида улар 450 нафар бўлган бўлиши мумкин. Ҳужумга алоқадор экстремистларнинг аниқ сони номаълум. Шунингдек, озод этилган 17 нафар гаровга олинганлар “шошилинч тиббий ёрдам” учун шифохонага ётқизилгани хабар қилинди. Уларнинг жароҳати қай даражада жиддий экани аниқ эмас.
Телеканал маълумотларига кўра, ҳужум қилган шахслар поездни Афғонистон ва Эрон билан чегарага яқин чекка ҳудудга олиб боришган. Гаровдагиларни озод қилиш бўйича махсус операция бошланганидан кейин жангарилар кичик гуруҳларга бўлинган. Телеканалнинг хавфсизлик кучларидаги манбаларига кўра, экстремистлар сунъий йўлдош телефонларидан фойдаланмоқда ва Афғонистонда экани тахмин қилинаётган ҳужум ташкилотчилари билан алоқа ўрнатмоқда. Операция жангарилар гаровга олинганлардан тирик қалқон сифатида фойдаланаётгани билан мураккаблашди, деб хабар бермоқда телеканал.
Сешанба куни “Белужистон озодлик армияси” экстремистик гуруҳи жангарилари Покистонда Кветта шаҳридан (Белужистон вилоятининг маъмурий маркази) Пешовар шаҳрига (Хайбар-Пахтунхва вилоятининг маъмурий маркази) кетаётган поезднинг 450 нафар йўловчисини гаровга олди. Экстремистлар темир йўл рельсларини портлатиб, кейин поездга қарата ўт очган. Поезд машинисти жароҳатланган. Ҳужум вақтида поезд хавфсизлиги ходимлари ва жангарилар ўртасида отишма содир бўлган, деб хабар беради tass.ru.
