2020 йилнинг декабрь ойида Ўзбекистон аҳолисига 1,74 миллиард кВт/соат, 2018 йил декабрь ойида эса (Энергетика вазирлиги ташкил этилишидан аввал) – 1,57 миллиард кВт/соат электр энергияси етказиб берилган. Ўсиш 11% ни ташкил этди.
Умуман олганда 2020 йилда мамлакатимиз бўйлаб электр энергияси истеъмоли 69,1 миллиард кВт/соатни ташкил қилиб, бу 2019 йилга нисбатан 6,1% га ва 2016 йилдаги кўрсаткичга нисбатан 20,1%га кўпдир.
Электр энергияси истеъмолининг бундай ортиши қандай таъминланган?
2020 йилда мамлакатимиз электр станцияларида 66,4 миллиард квт/соат электр энергияси ишлаб чиқилган бўлиб, бу 2019 йилдаги кўрсаткичга нисбатан 5% га, 2016 йилга нисбатан 12,6% га кўп.
Мамлакатимизда қўшимча электр энергиясини ишлаб чиқариш генерация қилинадиган қувватларни кенгайтириш бўйича инвестиция лойиҳаларини амалга ошириш ҳисобига амалга ошириляпти. Уларнинг барчаси замонавий энергия тежовчи технологияларга асосланган.
Хусусан, 2016 йилда қабул қилинган Инвестиция дастурида кўзда тутилган лойиҳаларни амалга ошириш ҳисобига давлат кафолати асосидаги кредитлар ҳисобидан 3,7 ГВтдан ортиқ қувватлар ишга туширилди.
Бунга қатор электр станцияларини қуриш ва модернизация қилиш ҳисобига эришилди. Шу тариқа, 900 МВт янги қувватлар Толимаржон ИEС, 560 МВт – Тахиатош ИEС, 450 МВт – Навоий ИEС, 370 МВт - Тошкент ИEМ, 150 МВт Ангрен ИEСдаги кўмир энергоблокидан олинди. Яъни, 1 та янги электростанцияси, 4 та янги гидроэлектростанцияси бунёд этилиб ва мавжуд электростанцияларни кенгайтириш ишлари амалга оширилди.
Наманган вилоятида қурилган янги Тўрақўрғон иссиқлик электр станцияси бугунги кунда Фарғона водийсининг учта вилояти истеъмол қилаётган электр энергияси ҳажмининг ярмини ишлаб чиқаради. Тўрақўрғон ИEС ишга туширилишидан аввал Фарғона водийсининг энергия таъминоти фақатгина Ўзбекистоннинг бошқа ҳудудлари ва Қирғизистон Республикасидан импорт қилинаётган электр энергияси ҳисобига амалга оширилар эди.
Инвестиция дастурида кўзда тутилган лойиҳалар тўлиқ амалга оширилса, мамлакатимизда ҳар йили 2016 йилга нисбатан 21 миллиард кВт/соатга кўп электр энергияси ишлаб чиқарилади. Бундан ташқари, амалдаги электр станцияларини модернизация қилиш ва янгиларини қуришда қўлланилаётган энергия тежамкор технологиялар 1 кВт/соат учун ёқилғи харажатларини 1%га тушириш имконини беряпти.
Натижада электр энергиясини ишлаб чиқишда ўртача 2 миллиард кубометр табиий газ тежалади.
2020 йилнинг ўзида хорижий инвесторлар билан давлат-хусусий шериклиги асосида олтита янги электр станциялари қурилиши бошлаб юборилди. Уларнинг умумий қиймати 2 миллиард доллар, умумий қуввати эса 2 700 мегаваттни ташкил этади.
2020 йилда инвестиция лойиҳалари босқичлари амалга оширилиши натижасида 2021 йилда мамлакатимизда 1 387 мегаваттлик қувватлар бўлган 9 янги электростанцияси ишга туширилади.
Улардан шу йилнинг октябрь ва ноябрь ойлари ўзида турк компаниялари билан ҳамкорликда қуввати 940 МВт бўлган 4 та янги ИEС қурилади.
Шунингдек жорий йилнинг октябрь ойида ҳар бирининг қуввати 100 МВт бўлган иккита қуёш электр станцияларини ишга тушириш режалаштирилган (Самарқанд вилоятида Total Eren (Франция), Навоий вилоятида Masdar (БАА) ўз лойиҳаларини амалга оширяпти).
Гидроэнергетика соҳасида ҳам қатор лойиҳалар амалга ошириляпти. 2021 йил июнь ойида ГEСнинг Чирчиқ - Бўзсув каскадига кирувчи «Камолот» гидроэлектрстанцияси қурилиши якунланади. Шунингдек июнь ойида Сурхондарё вилоятидаги Тўполонг дарёсида Зарчоб кичик ГEСлари каскадини ишга тушириш ҳам режалаштирилган, деб хабар беради Энергетика вазирлиги матбуот хизмати.
