Лого Лого-пв-уз

    Инсон ҳуқуқлари соҳасидаги илмий тадқиқотлар истиқболлари муҳокама қилинди

    Фан 11 ноябр 2022 395

    2022 йил 11 ноябрда Ўзбекистон Республикаси Фанлар академияси Давлат ва ҳуқуқ институтида «Инсон ҳуқуқ ва эркинликлари масаласидаги амалий ва фундаментал илмий тадқиқотларни фаоллаштиришда илмий мувофиқлаштириш кенгашларининг ўрнини кучайтириш» мавзусида йиғилиш бўлиб ўтди.

    Тадбир Инсон ҳуқуқлари бўйича Ўзбекистон Республикаси Миллий маркази ҳузуридаги Илмий мувофиқлаштириш кенгаши ҳамда Давлат ва ҳуқуқ институти Мувофиқлаштириш кенгаши билан ҳамкорликда ташкил этилди.

    Йиғилишда Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Фанлар академияси Давлат ва ҳуқуқ институти, шунингдек, Россия Ташқи ишлар вазирлигининг Москва халқаро муносабатлар давлат институти (университети) олимлари иштирок этди.

    Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Инсон ҳуқуқлари бўйича Ўзбекистон Республикаси Миллий маркази директори академик Акмал Саидов йиғилишни очар экан, инсон ҳуқуқ ва эркинликлари замонавий ҳуқуқшуносликнинг энг асосий соҳаларидан бири эканлигини таъкидлади.

    Айни соҳадаги халқаро ҳамкорлик Ўзбекистонда ҳуқуқшуносликни ривожлантиришнинг етакчи йўналишларидан ҳисобланади, деб таъкидлади академик А.Садиов. Кейинги йилларда Инсон ҳуқуқлари бўйича Ўзбекистон Республикаси Миллий маркази инсон ҳуқуқлари назарияси ва амалиётини ривожлантиришга ўз ҳиссасини қўшиб келяпти.

    Ўз навбатида, Ўзбекистон Республикаси Фанлар академияси Давлат ва ҳуқуқ институти директори, юридик фанлар доктори М.Турғунов ушбу илмий муассасанинг асосий мақсад ва вазифалари ҳақида сўз юритди. Давлат ва ҳуқуқ институтининг Ўзбекистон юридик фанини такомиллаштириш соҳасидаги фаолияти хусусида қисқача ахборот берди.

    Тадбирда Россия Ташқи ишлар вазирлигининг Москва халқаро муносабатлар давлат институти (университети) профессори, юридик фанлар доктори Марк Энтин «Инсон ҳуқуқлари бўйича Евроосиё конвенциясини имзолаш: қаршилар ва тарафдорлар» мавзусида маъруза қилди. Маъруза тадбир иштирокчиларида катта қизиқиш уйғотди.

    М.Энтин Москва халқаро муносабатлар давлат институти (университети) битирувчиси бўлиб, кўп йиллар Россия Фанлар академияси ва Ташқи ишлар вазирлигида ишлаган, 2012-2016 йилларда Люксембургда Россия элчиси бўлган. Ҳозирги вақтда бир қатор илмий кенгашларда фаолият юритади, Халқаро ҳуқуқ бўйича 600 дан ортиқ илмий мақола муаллифи ҳисобланади.

    Йиғилишда, шунингдек, Давлат ва ҳуқуқ институти директорининг ўринбосари, юридик фанлар доктори, профессор А.Тўлаганов, илмий ходимлар Р.Ҳакимов, Р.Назаров, Ж.Нематов, Я.Квитков ва бошқалар савол ҳамда мулоҳазалари билан иштирок этди. Онлайн чиқишлар билан вилоятлардан вакиллар, жумладан, Қорақалпоғистон, Термиз, Самарқанд, Наманган давлат университетлари юридик факультетлари деканлари ҳам қатнашди.

    Тадбир сўнгида академик А.Саидов Ўзбекистон ва Россия олимлари ўртасида илмий-амалий ҳамкорлик яхши йўлга қўйилганини эътироф этди. Ушбу ибратли анъана бундан кейин ҳам давом этишига ва ўзининг муҳим самараларини беришига ишонч билдирилди.

    Инсон ҳуқуқлари бўйича Ўзбекистон Республикаси Миллий маркази
    матбуот хизмати.