Nike компаниясининг бош директори Жон Донахонинг маълум қилишича, COVID-19нинг таҳдиди натижасида жаҳондаги ўнлаб мегаполис шаҳарларда Nike бренди асосида иш юритаётган савдо марказлари ўз фаолиятларини тўхтатиш остонасида турибди. Молиявий ҳисоб-китоблар бўйича компания ўтган йилнинг уч ойига нисбатан 790 миллион доллар зарар кўрди.
Бироқ 25 июндан дунёдаги 90 фоиз компания тизимидаги шохобчалар фаолияти қайта жонлантирилиши кутиляпти. Бу кутилган самара берадими йўқ, ҳозирча номаълум. Аммо пандемия шароитида онлайн савдонинг жонланганлиги 2020 йилнинг шу давригача компанияга умумий даромаднинг 30 фоизини келтирди.
Халқаро олимпия қўмитасида спорт анжомлари ва жиҳозлари бўйича фаолият кўрсатаётган мутахассисларнинг эътирофича, коронавирус нафақат “Nike”, балки дунёда ўз ўрнига эга бўлган бошқа бренддаги компанияларнинг иқтисодий тизимига зарар келтирган бўлсада, спорт оёқ кийимлари, либослар ва бошқа жиҳозларнинг янгича дизайнларининг яратилишига, деярли 15-20 йилдан бери ўзгармаган спорт формаларининг сифат даражаси яхшиланишига хизмат қилади.
