Мутахассислар Aргентинадаги кекса одамларнинг аҳволини таҳлил қиларкан, улар коронавирус билан касалланганидан камида олти ойдан кейин Aльцгеймер касаллиги билан боғлиқ хотира ва тафаккурдаги ўзгаришларга учраганини аниқлади.
Бошқа тадқиқотчилар Нью Йорк аҳолиси қонида деменция билан боғлиқ оқсилларни топди, уларда коронавирус эрта босқичда неврологик аломатларни келтириб чиқарган.
Тадқиқотда иштирок этган 300 нафар кекса кишининг аҳволи ўрганилганда инфекцияга чалинганидан уч-олти ой ўтгач уларнинг қарийб 20 фоизида қисқа муддатли хотира муаммолари бўлган. 34 фоизида жиддий бузилишлар, жумладан, сўзларни топа олмаслик ва хотиранинг узоқроқ сақланишида қийинчилик бор эди.
Касалликнинг оғир шаклини ўтказганларнинг ҳид сезишида муаммолар юзага келган. Миянинг хушбўй ҳид учун масъул бўлган қисми хотира учун муҳим бўлган жойлар билан бевосита боғлиқ ва ҳид билиш қобилиятининг йўқолиши баъзида Aльцгеймер ёки Паркинсон каби дегенератив касалликларнинг дастлабки белгисидир.
Яна бир гуруҳ олимлар коронавирус туфайли касалхонага ётқизилган 300 дан ортиқ кексаларни синаб кўрди. Уларнинг қарийб ярмида чалкашлик каби неврологик аломатлар кузатилган. Мутахассислар уларнинг қонида оқсиллар даражаси “сакраш”ини аниқлади, бу асаб тизимининг яллиғланиши, касаллик учун хос бўлган мия ҳужайраларининг шикастланиши билан боғлиқ.
Дастлабки натижалар Aльцгеймер уюшмаси (Alzheimer's Association) йиғилишида маълум қилинди. Коронавирус Aльцгеймер ёки бошқа мия муаммолари хавфини янада ошириши мумкинми ёки одамлар охир-оқибат тузалиб кетадими ёки йўқми, буни аниқлаш учун кўпроқ тадқиқотлар зарур.
