Суҳбат давомида ЕТТБ иштирокида амалга оширилаётган лойиҳалар ва Банк фаолияти йўналишларига кирадиган ҳамда «Ўзбекистон 2030» стратегияси мақсадларига мос келадиган қатор янги ташаббуслар муҳокама этилди. Томонлар биргаликда ишлаш ва ҳамкорликни чуқурлаштиришга ўзаро тайёр эканликларини билдирдилар.
Банк вакилларига янги ташаббус – республика ҳудудларида ривожланган мамлакатлар бозорларида ўз бизнесини кенгайтиришга тайёр бўлган йирик тадбиркорлар билан бевосита ишлаш таклиф этилди. Анди Аранитаси тадбиркорлар билан тўғридан-тўғри учрашувлар ўтказиш маҳаллий инвестиция имкониятларини аниқлаш ва барқарор ишбилармонлик алоқаларини ўрнатиш воситаси сифатида муҳимлигини юқори баҳолади ва режалаштирилган ташрифларда Банк вакилларининг иштирок этишига катта қизиқиш билдирди.
Конструктив суҳбат Ўзбекистон Республикаси Президенти ҳузуридаги Хорижий инвесторлар кенгашининг (ХИК) бўлажак йиғилишининг ташкилий жиҳатларини муҳокама қилиш имконини берди. Лазиз Кудратов давлат органлари ва халқаро молия институтлари ўртасида очиқ мулоқотни ривожлантиришда ХИК платформасининг муҳим ролини қайд этди. ЕТТБнинг учрашувда фаол иштирок этиши ва мамлакатнинг инвестиция муҳитини янада яхшилаш бўйича амалий таклифлар киритишига ишонч билдирилди.
Учрашув якунида томонлар самарали ҳамкорликни давом эттириш ва барча соҳаларда стратегик шерикликни мустаҳкамлашга тайёр эканликларини яна бир бор тасдиқладилар, деб хабар беради Инвестициялар, саноат ва савдо вазирлиги матбуот хизмати.
