Бу ҳақда қўмита матбуот хизмати маълум қилди.
Унга кўра, ўрганиш давомида Сурхондарё вилояти Бойсун тумани «Темир дарвоза» маҳалласида яшовчи Ўзбекистон овчилар ва балиқчилар спорт бирлашмаси аъзолари С. Ҳалимов (1991 йилда туғилган, оилали), Ф. Жумақулов (1987 йилда туғилган, оилали), О. Жумақулов (1978 йилда туғилган, оилали) ижтимоий тармоқларда тарқалган овланган қуён ва какликларни Бойсун тумани ҳудудида овлаганлиги аниқланди.
Ҳолат юзасидан улар билан суҳбат ўтказилганда 32 дона қуён ва 1 дона какликни жорий йилнинг 14 сентябрь куни Бойсун тумани тоғли ҳудудларига чиқиб ов қуроллари билан (республика ҳудудида ов қилиш ва балиқ овлаш қоидалари ва «Ҳайвонот дунёсини муҳофаза қилиш ва ундан фойдаланиш тўғрисида»ги қонунига зид равишда) овлаганликлари маълум бўлди.
Фотосуратларда акс эттирилган беш нафар фуқародан икки нафари ов қилмагани аниқланди.
Ҳуқуқбузарларга нисбатан Маъмурий Жавобгарлик тўғрисидаги Кодексининг 90-моддаси 1-қисми билан маъмурий жарималар қўлланилиб, ҳайвонот дунёсига етказилган зарарни ундириш чоралари кўрилмоқда.
Шунингдек, тармоқларда тарқалган фото суратдаги овланган какликлар 2019 йил Ўзбекистон овчилар ва балиқчилар спорт бирлашмаси аъзоси фуқаро С. Халимов томонидан тегишли ҳужжатларга асосан овлаганликлари аниқланди.