Сурхон давлат қўриқхонасида ўрнатилган “фотоқопқон” бир нечта ёввойи ҳайвонларни камера объектига муҳрлади. Ушбу суратларда морхўр, жайра, тўнғиз, бўри каби ҳайвонларни кўришимиз мумкин.
Сурхондарё вилояти Экология ва атроф-муҳитни муҳофаза қилиш бошқармаси ахборот хизматининг маълум қилишича, “фотоқопқон”га тушган ҳайвонларнинг ичида морхўр энг антиқаси ҳисобланади. Морхўр бутунлай йўқ бўлиб кетиш арафасида турган кенжа тур ҳисобланади. Шунинг учун ҳам у “Қизил китоб”га киритилган. Морхўр Кўҳитанг, Бойсунтоғ, Боботоғ тоғ тизмаларида тарқалган. 1950–1970 йилларда кескин камайиб кетган. Кейинчалик Сурхон қўриқхонасида олиб борилган муҳофаза чоралари туфайли ушбу турнинг сони аста-секин барқарорлашган. Бироқ, бошқа ҳудудларда қисқаришда давом этмоқда. Ўзбекистонда тахминан 400–450 бош морхўр мавжуд, деб тахмин қилинади.
