Нурота туманида жорий йил 200 гектар ерга такрорий экин экилиши режалаштирилган.Айни пайтда туманда 60 гектар майдонга кечки картошка экиш ишлари жадаллик билан олиб бориляпти. «Ўзагроинспекция» вилоят бошқармаси ҳамда туман бўлими ходимлари жойларда такрорий экинларнинг вақтида экилиши бўйича назорат тадбирларини олиб боришмоқда.
Бунинг учун фермерларга «Нурота томорқа экспорт» масъулияти чекланган жамияти томонидан 50 тонна, «Тошназар бобо» фермер хўжалигидан эса 49 тонна уруғлик картошка етказиб берилди.
Ҳудуднинг «Янги турмуш» маҳалласида жойлашган «Жиянбой» фермер хўжалигининг 2 гектар майдонига кечки картошка уруғидан экилди. Ҳозирда майдонда биринчи чопиқ ишлари олиб бориляпти.
– Фермер хўжалигимиз умумий майдони 65 гектардан иборат бўлиб, шундан 5 гектари боғдан иборат, - фермер хўжалиги раиси Фарҳод Яқубов. – Боғимизга олма, олхўри экилган. Бу йил 30 тоннага яқин мева олишни мўлжаллаб турибмиз. Бундан ташқари, 25 тонна уруғлик картошканинг «Зуҳра» ва «Скарлет» (қизил картошка) навларидан экдик. Ўтган йили ҳам картошка экиб, 50 тонна ҳосил олгандик. Ўтган йили махсус «Картошка ковлагич» техникасини харид қилганмиз. Бу ишимизни енгиллаштиради. Рўзғоримиз учун картошка харид қилишга эҳтиёж йўқ. Даромади ҳам меҳнатимизга яраша бўляпти.
Озиқ-овқат хавфсизлигини таъминлаш, такрорий экинларни ўз вақтида экилиши юзасидан «Ўзагроинспекция» Нурота туман бўлими ходимлари томонидан жойларга чиқиб, тушунтириш тадбирларини олиб бориляпти. Бундан ташқари, фермерларга ёқилғи-мойлаш материллари, ўғит ва бошқаларнинг етказилиб берилишига ҳам эътибор қаратилган.
Маъруфжон Ўрозов,
Ўзбекистон Фермер, деҳқон хўжаликлари ва томорқа ер эгаларини қўллаб-қувватлаш жамғармаси етакчи мутахассиси.