France Football нашри яқинда 2022 йилги “Олтин тўп” совринига номзод қуйидаги 30 футболчи номини эълон қилди:
Тибо Куртуа (“Реал”), Рафаэл Леау (“Милан”), Кристофер Нкунку (“Лейпциг”), Муҳаммад Салоҳ (“Ливерпуль”), Йозуа Киммих (“Бавария”), Трент Александер-Арнолд (“Ливерпуль”), Винисиус Жуниор (“Реал”, Бернарду Силва (“Манчестер Сити”), Луис Диас (“Ливерпуль”), Роберт Левандовски (“Барселона”/ “Бавария”), Риёд Маҳрез (“Манчестер Сити”), Каземиро (“Реал”), Сон Ҳён Мин (“Тоттенхэм”), Фабиньо (“Ливерпуль”), Карим Бензема (“Реал”), Фоден (“Манчестер Сити”), Ҳарри Кейн (“Тоттенҳэм”), Садьо Мане (“Бавария”/“Ливерпуль”), Дарвин Нуньес (“Ливерпуль”), Майк Меньян (“Милан”), Кевин де Брюйне (“Манчестер Сити”), Себастьян Аллер (“Боруссия” Дортмунд/“Аякс”), Лука Модрич (“Реал”), Криштиану Роналду (“Манчестер Юнайтед”), Антонио Рюдигер (“Реал”/“Челси”), Жоау Канселу (“Манчестер Сити”), Эрлинг Ҳоланд (“Манчестер Сити”/“Боруссия” Дортмунд), Килиан Мбаппе (“ПСЖ”), Вирджил ван Дейк (“Ливерпуль”),
Душан Влаҳович (“Ювентус”).
Орадан бироз вақт ўтгач Goal.com нашри ўз талқини бўйича “Олтин тўп” соврини даъвогарлари рейтинги якуний ўнлигини эълон қилди.
Унга кўра, якунланган мавсумда ЕЧЛ ғолиби ва Ла Лига чемпиони бўлиш билан бирга, тўпурарлар орасида якка пешқадамликни қўлга киритган Карим Бензема, кутилганидек, биринчи ўринда қайд этилган. Кейинги ўринларни Садьо Мане (“Ливерпуль”/“Бавария”), Муҳаммад Салоҳ (“Ливерпуль”), Роберт Левандовски (“Бавария”/“Барселона”), Килиан Мбаппе (“ПСЖ”), Винисиус Жуниор (“Реал”), Лука Модрич (“Реал”), Кевин де Брюйне (“Манчестер Сити”), Тибо Куртуа (“Реал) ва Фил Фоден (“Манчестер Сити”) банд этган.
Шу ўринда таъкидлаш лозимки, кучли ўттизталикка сўнгги йилларнинг энг кучли футболчиларидан Раналду киргану, Месси кирмай қолган. Бу футбол ишқибозларида “нега?” деган савол уйғотди.
France Football журнали бош муҳаррир ўринбосари Эммануэль Боян бу саволга қуйидагича жавоб берди:
“Ҳамма гап статистикада. Бу йил Роналду миллий жамоалар даражасида энг яхши тўпурар бўлди. Айнан у “Манчестер Юнайтед”нинг Чемпионлар лигасида гуруҳдан кейинги босқичга чиқишини таъминлади.
Премьер-лигада 18та гол киритиб, икки баҳсда ҳет-трик қайд этди. 49 ўйинда 32та гол Роналдунинг энг яхши мавсумларидагидек эмасдир, аммо “Олтин тўп”га даъвогар 30 футболчи орасида бўлиш учун етарли...
Албатта, бунгача “Олтин тўп” учун 15 марта даъвогар бўлган, қолаверса, совриннинг амалдаги соҳиби саналмиш Месси жиддий номзод эди. Биз Лионелнинг 30 футболчидан иборат рўйхатга қўшишни муҳокама қилдик, аммо соврин ғолибини аниқлашдаги янги қоидалар унга панд берди. Энди биз футболчининг фаолияти давомидаги ютуқларини инобатга олмаймиз, фақатгина тақвим йилидаги натижасига қаралади.
Тан олиш керак, Мессининг Париждаги дастлабки мавсуми кутилгандан яхши ўтмади. У статистика жиҳатдан ҳам, жамоавий натижалар борасида ҳам яхши таассурот қолдирди, дейиш қийин”.
“Олтин тўп” эгаси ким бўлиши ҳақида футболчилар, мураббийлар ҳам ўз фикр, мулоҳазаларини билдиришда давом этмоқда.
Масалан, “Реал” бош мураббийи Карло Анчелотти ўттизталик рўйхатда Кроос, Вальверде, Милитао ва Алаба йўқлигидан ҳайрон бўлганини айтди.
“ПСЖ” форварди Килиан Мбаппе талқинича эса, “Олтин тўп” учун учта асосий даъвогар бор. Улар Бензема, Мбаппе ва Мане.
Хуллас, турли хил фикрлар билдирилаверади. Биз эса бу саволга аниқ жавобни жорий йилнинг 17 октябрь куни билиб оламиз.
