Ҳасан Нормуродов узоқ йиллар халқ таълими тизимида ишлаган. Кейинчалик «Нуроний» жамғармасининг Самарқанд вилояти бўлими раиси сифатида меҳнат фахрийларини ижтимоий ҳимоя қилиш ишларига катта ҳисса қўшган. Сўнгги кунларда Самарқанд вилояти Маҳалла ва оилани қўллаб-қувватлаш бошқармаси бошлиғининг ўринбосари вазифасида ишлаб келаётганди.
82 яшар Ҳасан Нормуродов жонкуяр ва самимий инсон сифатида вилоят аҳолиси ўртасида ҳурмат қозонган. 2019 йилда Президентимиз фармонига кўра «Ўзбекистон Қаҳрамони» унвони билан тақдирланган.
Республика шошилинч тиббий ёрдам илмий марказининг Самарқанд филиалида даволанаётган Ҳасан Нормуродовни яқинда Ўзбекистон Республикаси Президенти Шавкат Мирзиёев бориб кўрган эди.
«Янги Ўзбекистон» ва «Правда Востока» газеталари таҳририяти жамоаси марҳумнинг оила аъзолари ва яқинларига ҳамдардлик билдиради.
