Мазкур маълумотни Энергетика вазирлиги очиқларкан, бу Президентимиз томонидан 2023 йил 20 сентябрда БМТ Бош Ассамблеясининг 78-сессияси ҳамда 2025 йил 23 сентябрь куни Нью-Йорк шаҳридаги БМТ Бош Ассамблеясининг 80-юбилей сессиясида белгилаб берилган стратегик вазифалар – иқтисодиётни иқлим ўзгаришларига мослаштириш, углерод нейтраллигига эришиш ва «яшил» энергетика улушини кескин ошириш йўлида амалга оширилаётган ишларнинг ёрқин ифодаси эканини таъкидлайди.
Хабарга кўра, бугунги кунда мамлакатимизда умумий қуввати 4 682 мегаватт бўлган 12 та қуёш фотоэлектр станцияси ва 5 та шамол электр станцияси ишлаб турибди.
«Яшил» энергия ҳисобидан:
- 2 млрд 730 млн куб метр табиий газ тежалди;
- Атмосферага чиқиши мумкин бўлган 4 млн тонна зарарли моддалар олди олинди.
Яна бир муҳим кўрсаткич, жорий йил бошидан 22 октябрь соат 19:00 ҳолатигача Ўзбекистондаги барча гидроэлектр, қуёш ва шамол станциялари жами 14 млрд 520 млн кВт·соат электр энергияси ишлаб чиқарди. Бу – мамлакатимиздаги умумий генерациянинг 23 фоизини «яшил энергия» ташкил этаётганини англатади.
Бу эса 7,5 млн хонадоннинг 10 ойлик ёки 6 млн хонадоннинг бир йиллик электр эҳтиёжига тенг!
Эслатиб ўтамиз, бундан 29 кун аввал, яъни 23 сентябрь куни соат 14:00 да юртимиздаги қуёш ва шамол электр станциялари томонидан ишлаб чиқарилган электр энергиси 8 млрд кВт·соатни ташкил этган эди.
