Бунда, албатта қурувчилар коронавирус инфекциясига қарши эмланган ёки уларнинг қўлларида Россияга келишдан камида 5 ой аввал касалланганлик ҳақидаги ҳужжати бўлиши керак.
Бу тўғрида тегишли ҳужжат Россия Федерациясининг ҳуқуқий ахборот расмий интернет-порталида чоп этилган, деб хабар беради ТАСС.
«Қурилиш соҳасида хўжалик юритувчи Россия юридик шахсларида вақтинчалик меҳнат фаолиятини олиб бориш учун Ўзбекистондан қурувчини жалб этиш бўйича пилот лойиҳа амалга оширилсин», — дейилади қарорда.
Меҳнат, Ички ишлар, Ташқи ишлар, Қурилиш, Соғлиқни сақлаш, Фан ва таълим ва Фавқулодда вазиятлар вазирликлари, Федерал тиббий-биологик агентлиги, Федерал божхона хизмат, Москва шаҳар ҳукумати, кўп функцияли миграция маркази ва Россия ИИВ паспорт-виза маркази пилот лойиҳа иштирокчиларидир.
Пилот лойиҳа доирасида Ўзбекистондан 10 минг ишчини жалб этиш режалаштириляпти. Улар Россия Федерацияси ҳудудига киришдан 72 соатдан ошмаган вақтда коронавирус инфекциясига ПСР-тест топширган бўлиши керак. Ундан ташқари Россия Федерацияси ҳудудига киришдан 14 кундан ошмаган вақтда коронавирус инфекциясига қарши «Спутник лайт» ёки яна бошқа турдаги вакцина билан эмлангани тўғрисида, ёки Россияга келишдан камида 5 ой аввал касалланганлик ҳақидаги ҳужжат тақдим этиши керак бўлади.
Россия Федерацияси қурилиш вазири ўринбосари Никита Стасишин таъкидлаганидек, қарорнинг қабул қилиниши Ўзбекистондан санитар-эпидемиологик хавфсизликни таъминлаш муҳимлигини инобатга олган ҳолда меҳнат мигрантларини жалб этиш бўйича амалий қадамларга ўтиш имконини беради. Меҳнат ресурслари нафақат уй-жой қурилишига, шунингдек йирик инфратузилма лойиҳаларини амалга оширишга ҳам жалб этилади. Тиббий кўрик, ПСР-тестдан ўтиш ва эмланиш мигрантларнинг Россияга келишидан аввал Ўзбекистон ҳудудида амалга оширилади, — деб кўрсатди Стасишин.
«Лойиҳада иштирок этувчи қурилиш компаниялари, яъни салоҳиятли иш берувчилар аниқ мутахассислик ва фаолият йўналиши бўйича ишчи кучига бўлган талабни тақдим этди. Тегишли мутахассисликдаги меҳнат ресурслари айнан уларнинг талабларига мувофиқ жалб этилади. Ундан ташқари, хорижлик фуқароларга бериладиган патентда аниқ иш берувчи компания кўрсатилади. Бу эса меҳнат шартномаси бўйича мажбуриятларни бажармасликнинг олдини олиш имконини беради», — деб қўшимча қилди Россия Федерацияси қурилиш вазири ўринбосари.
