Россияда ота-онаси йўл-транспорт ҳодисаси оқибатида ҳалок бўлган 11 ёшли бола Ўзбекистонга қайтарилди. Бу ҳақда Болалар омбудсмани хабар берди.
Маълум қилинишича, жорий йилнинг 14 апрель куни Россия Федерациясининг Астрахан вилоятида икки енгил автомобиль тўқнашуви туфайли содир бўлган йўл-транспорт ҳодисаси оқибатида Ўзбекистон фуқароси бўлган (2013 йилда туғилган ўғил бола) Б.Р. шифохонага ётқизилган. Афсуски, ушбу фожиали ҳодиса оқибатида боланинг автомашинада бўлган ота-онаси вафот этган.
Бола енгил жароҳат олган бўлиб, кўрсатилган тиббий ёрдам туфайли соғлиғи тиклангандан сўнг, уни Ўзбекистонга қайтариш ва яқин қариндошлари қарамоғига топшириш масаласи ўрганилган. Хусусан, фожиадан хабар топган боланинг яқин қариндошлари етиб келиб вақтинча васийликни расмийлаштириш жараёнини бошлаган бўлишса-да, Б.Р. ни Россия Федерациясидан олиб чиқиш учун ҳужжатлар етарли бўлмаган.
Мазкур масала юзасидан Россия Федерацияси Болалар омбудсмани Мария Лвова-Белова Ўзбекистон Болалар омбудсмани Сурайё Раҳмоновага мурожаат қилган.
Болалар омбудсмани ва Ички ишлар вазирлигининг тезкор ҳамкорлик чоралари натижасида Ўзбекистоннинг Ростов-на-Дону шаҳридаги Бош консулхонаси ҳамда Астрахан вилояти Ижтимоий ривожланиш ва меҳнат вазирлиги томонидан зарурий амалий ёрдам кўрсатилиб, болага ва унинг қариндошига қисқа фурсатда тегишли ҳужжатлар расмийлаштирилган ва боланинг ватанга қайтиши таъминланган.
Билдирилишича, ҳозирда бола Ўзбекистонга олиб келиниб, қариндошлари (онасининг синглиси) қарамоғига топширилган. Ижтимоий ҳимоя миллий агентлиги томонидан болага расман васийлик ва унга зарур бўлган ижтимоий-психологик чоралари кўрилади.
