Жорий йилнинг 1 январь кунидан 30 ноябрига қадар пойтахтда пиёдалар иштирокида 524 та йўл-транспорт ҳодисалари қайд этилган бўлиб, натижада 32 киши бадан шикастлари туфайли ҳаётдан кўз юмган ва яна 487 кишига турли оғирликдаги бадан шикастлари етган.
Бу каби фожеалар ҳар доим ҳам ҳайдовчилар айби билан содир бўлмайди: баъзида пиёданинг ўзи белгиланган қоидаларни бузиб, йўлда кутилмаган омилга айланмоқда. Шу сабабли Тошкент шаҳар ИИББ ЙҲХБ йўл-патруль хизмати ходимлари томонидан профилактик чораларга катта эътибор қаратилмоқда.
Жумладан, 2021 йилнинг 11 ойи давомида йўл ҳаракати қоидаларини бузган пиёдаларга нисбатан жами 101 861 та маъмурий баённомалар расмийлаштирилган. Мазкур йўналишдаги ишлар давом этмоқда, дейилади хабарда.