15 сентябрь, душанба куни эрталаб АҚШ Қуролли кучлари АҚШга гиёҳванд моддаларни олиб ўтаётган “венесуэлалик наркотеррорчилар”га зарба берди. Бу ҳақда АҚШ Президенти Дональд Трамп ўша куни кечқурун Truth Social ижтимоий тармоғида баёнот берди.
Унинг сўзларига кўра, АҚШ ҳарбийлари Жанубий қўмондонлик ҳудудида фаолият юритувчи “аниқ идентификация қилинган, ўта зўравон наркокартеллар ва наркотеррорчиларни” нишонга олган. “Бу ўта зўравон наркокартеллар АҚШнинг миллий хавфсизлиги, ташқи сиёсати ва ҳаётий манфаатларига таҳдид солади”, деб таъкидлади Оқ уй раҳбари. Дональд Трампнинг сўзларига кўра, операция натижасида 3 нафар эркак террорчи йўқ қилинган. Бироқ, АҚШ Қуролли кучлари ҳеч қандай зарар кўрмади, деб хабар берди dw.com.
