13 октябрь куни Мисрда халқаро “тинчлик саммити” бўлиб ўтади. Учрашувда “Ғазодаги урушни тугатиш тўғрисида битим” имзоланиши режалаштирилган.
ҲАМАСнинг ўзи Шарм эш-Шейхда келишув имзоланишида қатнашмайди. “Маросимда фақат воситачилар, шунингдек, Америка ва Исроил расмийлари иштирок этади”, деди аввалроқ ҲАМАС вакили. Учрашувга АҚШ ва Миср Президентлари Дональд Трамп ва Абдулфаттоҳ ас-Сиси ҳамраислик қилади. Саммитда 20 га яқин дунё етакчилари, жумладан Буюк Британия Бош вазири Кир Стармер ва Германия канцлери Фридрих Мерц иштирок этади.
Трамп Исроил ва ҲАМАС ўртасидаги уруш тугаганини эълон қилди
АҚШ Президенти Дональд Трамп Исроил ва ҲАМАС ўртасидаги уруш тугаганини эълон қилди. Бу ҳақда у Исроил парламентидаги чиқишидан олдин журналистларга айтди. Оқ уй раҳбари, шунингдек, ҲАМАС қуролсизланиш бўйича ўз мажбуриятларини бажаришига ишонч билдирди.
“Бу мен учун катта шараф. Ажойиб ва гўзал кун, янги бошланиш”, деб ёзди Трамп Кнессет меҳмонлар китобида.
Исроил Бош вазири Биньямин Нетаньяху парламентда Дональд Трампга ҳамроҳлик қилди, деб хабар берди dw.com.
