Бу борада «Ўзбекнефтгаз» АЖ Бошқаруви раиси Меҳриддин Абдуллаев топшириғи билан ишларни янада жадаллаштириш режалаштирилган бўлиб оқова сувларни тозалаш иншоотларини модернизация қилиш, қайта қуриш ва янги замонавий иншоотларни барпо этиш йўли билан сувни тежашга эришиш мақсади қўйилган.
Хусусан, «Ўзбекистон GTL» МЧЖ заводида энг замонавий соатига 500 куб метр қувватга эга оқова сувларни тозалаш иншоотини қуриш ишлари олиб борилмоқда. Ҳосил бўладиган минерализациялашган, ёғли, ифлосланган юза сувлари ва маиший оқова сувларни тозалаш уч босқичда олиб борилади.
Биринчи босқичда ҳосил бўлган минерализациялашган оқова сувлари буғлантирувчи (испарител) кристализатор қурилмасида тузсизлантирилиб, юқори концентрацияли куб қолдиқлари сувсизлантирилади.
Иккинчи ва учинчи босқичда айнан тозалаш иншоотида кетма-кетлик билан амалга оширилади. Бу ерда тозалаш ишлари ҳозирги кундаги замонавий қурилмалар орқали механик, физик-кимёвий, биологик усуллар орқали амалга оширилади ва охирида тозалаш самараси энг юқори бўлган мембранали биореактор қурилмасида амалга оширилади. Тозаланган оқова сувлари тўлиқ қайта технологияга ишлатиш учун юборилади, деб хабар беради «Ўзбекнефтгаз» АЖ матбуот хизмати.
