Қайд этиш жоизки, мазкур танлов Ўзбекистон Республикаси Президенти Шавкат Мирзиёевнинг ёшлар билан учрашувлари ва Давлатимиз раҳбарининг Ёшлар куни муносабати билан қилган байрам нутқида баён этилган кўрсатмаларини ҳаётга татбиқ этиш мақсадида ўтказиляпти. Унда халқаро муносабатлар, жаҳон иқтисодиёти, халқаро ҳуқуқ йўналишлари бўйича мутахассислар тайёрлашга ихтисослашган олий ўқув юртлари талабалари иштирок этяпти.
Тадбирда Олий ва ўрта махсус таълим вазирининг биринчи ўринбосари Комилжон Каримов, Жаҳон иқтисодиёти ва дипломатия университети, Тошкент давлат шарқшунослик университети, Тошкент давлат юридик университети, Тошкент давлат иқтисодиёт университети раҳбарияти иштирок этди.
Учрашувда Янги Ўзбекистонни ривожлантириш Стратегияси доирасида амалга оширилаётган ислоҳотларнинг асосий мезонлари ёшларни ҳар томонлама қўллаб-қувватлаш, ҳуқуқ ва қонуний манфаатларини ҳимоя қилиш, истеъдод ва қобилиятини рўёбга чиқаришдан иборат экани таъкидланди. Янги Ўзбекистон ва Учинчи Ренессанс даври бунёдкорлари бўлган навқирон авлод вакиллари бўлгани учун бу масала ҳамиша Давлатимиз раҳбарининг диққат марказида.
В.Норов Ўзбекистон Республикаси Ташқи ишлар вазирлиги тизимида ёш кадрларни жалб этиш, уларнинг билим ва малакасини оширишга алоҳида эътибор қаратилаётганини таъкидлади. Мамлакат манфаатларини халқаро майдонда самарали илгари суриш, хорижий ҳамкорлар билан фаол ҳамкорлик қилиш, Ўзбекистон фуқароларининг хориждаги қонуний ҳуқуқ ва манфаатларини ҳимоя қилиш, ташқи ишлар вазирлиги зиммасига юклатилган вазифаларнинг сифатли бажарилишини фақат билимли, иқтидорли ва ҳар томонлама етук, юксак маънавий-ахлоқий фазилатларга эга кадрларгина таъминлай олади. Хусусан, жорий йилда Ташқи ишлар вазирлиги ҳузурида ташкил этилган «Ёш дипломатлар клуби» бўлажак дипломатик ходимларнинг зарур билим олиши, тажриба ва малака ошириши, инновацион иш услубларини ўрганиши учун мўлжалланган.
В.Норов танловнинг биринчи босқичидан муваффақиятли ўтган ўқувчиларни табриклаб, кейинги босқичларда муваффақият тилади. Хусусан, биринчи босқич ғолиблари билан Ўзбекистон Республикаси Ташқи ишлар вазирлиги марказий аппаратида суҳбат ўтказилади, шундан сўнг махсус тузилган комиссия уларни минтақавий ва функционал бошқармаларда амалиёт ўташ учун тақсимлаш тўғрисида қарор қабул қилади. Бу уларга дипломатик соҳада зарур билим, кўникма ва тажрибага эга бўлиш имконини беради, шундан сўнг талабалар Ўзбекистон Республикасининг хориждаги дипломатик ваколатхоналари ва консуллик муассасаларига амалиёт ўташ учун юборилади, деб хабар беради Ташқи ишлар вазирлиги матбуот хизмати.
