“Украина бу ҳафта [АҚШ Президенти Дональд] Трамп маъмуриятининг Россияга ён бериш орқали урушни қандай тугатиш, жумладан, Россиянинг Қримни 2014 йилда аннекция қилганини АҚШнинг потенциал тан олиши ва Киевнинг НАТОга аъзолигини рад этиш ҳақидаги бир қатор узоқни кўзлаган ғояларига жавоб бериши керак”, дейилади хабарда.
Шу билан бирга, Ғарб расмийларининг қайд этишича, АҚШ режаси 2022 йилдан кейин Россия таркибига кирган янги ҳудудларни тан олишни назарда тутмайди. Бироқ Вашингтон бу ҳудудлардан рус қўшинларини олиб чиқиб кетишни талаб қилмаяпти.
АҚШ Давлат департаментининг номини ошкор этмаган вакилига кўра, санаб ўтилган талаблар ультиматум эмас ва муҳокама қилиш учун “потенциал вариантлар рўйхати”нинг бир қисмидир. Вашингтон ҳозирда Киевдан жавоб кутмоқда. Материалда айтилишича, у ҳафта охирида Лондонда бўлиб ўтадиган АҚШ, Украина ва Европа вакилларининг учрашувида тақдим этилиши мумкин, деб хабар беради lenta.ru.
Аввалроқ Bloomberg ҳам АҚШ Москва ва Киев ўртасидаги кенг кўламли тинчлик битими доирасида Қримни Россия деб тан олишга тайёрлигини маълум қилган эди.
