Сирдарё вилояти Ховос туманида 237 гектар ер майдонида деҳқончилик қилаётган фермер далага сув тежовчи суғориш қурилмаларини ўрнатишга муваффақ бўлди.
Фермер Улуғбек Йўлдошев банкдан олган 1 миллиард 86 миллион сўмлик кредит маблағлари эвазига 54 гектар пахта майдонига замонавий рақамлаштирилган суғориш қурилмаларини ўрнатди. Гап шундаки, ушбу янги технология қўл телефони орқали бошқарилади.
– Илгари 54 гектар пахта майдонини 7-8 нафар сувчи кеча-кундуз бир ой мобайнида суғорар эди, — дейди фермер Улуғбек Йўлдошев. —Энди бу ишни бир ишчи кучи билан 6-7 кун ичида уддалаяпмиз.
Ўтган йили 237 гектар ернинг 110 гектар дала майдонига чигит қадаган фермер бу йил 1 миллиард 400 миллион сўмлик банк кредит маблағлари эвазига 56 гектар пахта майдонига яна қўшимча томчилатиб суғориш ускуналарини ўрнатди, деб хабар беради Сирдарё вилоят ҳокимлиги матбуот хизмати.