"Янги журналга омад тилайман!"

    Маданият 27 октябр 2021 1803

    Янги Ўзбекистоннинг жаҳон ҳамжамияти томонидан эътироф этилаётгани, юртимизга нисбатан қизиқиш ва эътиборнинг кучайиб бораётгани, шубҳасиз, кейинги беш йилликдаги сиёсий ислоҳотлар натижасидир.

    Мамлакатда сўз ва матбуот эркинлиги таъминлангани, инсоннинг ҳақ-ҳуқуқлари таъминланишига қатъий риоя қилинаётгани, болалар меҳнатидан батамом қутулганимиз, минг-минглаб фуқароларнинг қора рўйхатлардан чиқарилгани, сиёсий партиялар ва нодавлат нотижорат ташкилотлари, яъни фуқаролик жамиятининг ҳар қандай институтларига қоғозда эмас, амалда кенг имкониятлар яратиб берилгани чиндан ҳам Ўзбекистоннинг очиқ мамлакатлар қаторига қўшилишига асос бўлди.

    Миллий матбуотимиз ҳаётида муҳим воқеа – «Сиёсат» ижтимоий-сиёсий журналининг чоп этила бошланганини ҳам бугунги ислоҳотлар барқарорлигининг кичик бир намунаси, дейиш мумкин.

    Биз узоқ йиллар давомида сиёсий соҳада гапирмасликни, ҳатто Сиёсатшунослик фанини унутишни маъқул кўрдик. Ушбу фан олий таълим тизимидан чиқарилиб, бакалавр ва магистрларни тайёрлаш тўхтатилди. Натижада соҳага оид илмий ишлар ва мақолалар ҳам кескин камайди. 2010 йилга келиб эса ҳимоялар бўйича Кенгаш ёпилди. Фақат кейинги тўрт йилдагина Кенгаш фаолияти тикланиб, ҳимоялар яна бошланди.

    «Сиёсат» журналининг илк сонида эълон қилинган мақолалар билан танишиб, бугунга келиб айнан шундай нашрга жуда катта эҳтиёж бор эди, деган фикр ўтди хаёлимдан.

    Журналдаги «Президентлик соати», «Қизил ва қора нуқталар», «Хавфли ҳудуддан узоқлашяпмиз», «Барча йўллар таълимга олиб бориши керак», «Сиёсатшуносликни тақиқлаган ва рағбатлантирган даврлар, катта сиёсатчилар ва...» сарлавҳали таҳлилий мақолаларни ўқиб, янги журналнинг биринчи қадамлари ишончли эканига гувоҳ бўлдим.

    Юқорида қайд этилганидек, бугун ҳар биримиз жонажон юртимизда улкан ўзгариш ва янгиланишлар содир бўлаётганини кўриб турибмиз.

    Бундай ўзгаришлар замирида эса Ўзбекистондаги демократик жараёнларнинг ортга қайтмаслиги билан боғлиқ ишонч турибди.

    Албатта, бу ислоҳотларнинг мазмун-моҳиятини чуқур англаш, уларда фаол иштирок этиш, аҳолида уларга нисбатан дахлдорлик ҳиссини шакллантириш ниҳоятда муҳим ҳисобланади. Бу жараёнда эса турли усул ва воситалардан фойдаланилади. Уларнинг ичида энг самаралиси эса шубҳасиз, оммавий ахборот воситаларидир.

    Соҳадаги фаолиятим давомида кўплаб журналлар билан танишганман, ўқиганман. Лекин «Сиёсат» журналининг аввал кўрган журналларимдан анча фарқи бор.

    Бундай журналнинг чоп этилишини ушбу фанга бўлган муносабатнинг ўзгариши деб ҳам қараш мумкин. Қолаверса, ҳозирги жараёнларни сиёсий нуқтаи назардан таҳлил этишга бўлган эҳтиёж ҳам ошиб бормоқда.

    Айни чоғда, журнални янада ривожлантириш борасида айрим фикрларимни билдирмоқчиман: журналга яқин ва узоқ хориждаги олимлар, давлат арбоблари ва экспертлар ҳам жалб қилиниб, халқаро журналга айлантирилса, мақсадга мувофиқ бўларди.

    Нашрни хорижий тилларда чоп этилиши эса унинг ўқувчилари, жумладан хорижда ҳам маълум бир аудиториясини шакллантиришга олиб келади.

    Шунингдек, журналга хориждаги илмий марказларнинг экспертларини ҳам жалб қилиш зарур.

    Ана шундай саъй-ҳаракатлар натижаси сифатида журнални халқаро даражага олиб чиқиш, турли базалар, жумладан SKOPUS базасига киритиш юзасидан жиддий ҳаракатларни бугунданоқ бошлаш лозим.

    Ўйлайманки, «Сиёсат» журнали таҳририяти бундай ўзгаришларни ҳам амалга ошира олади.

    Алишер Мўминов,

    Сиёсий фанлар доктори, ЎзМУ профессори

    No date selected
    март, 2024
    1
    2
    3
    4
    5
    6
    7
    8
    9
    10
    11
    12
    13
    14
    15
    16
    17
    18
    19
    20
    21
    22
    23
    24
    25
    26
    27
    28
    29
    30
    31
    Use cursor keys to navigate calendar dates