Унда иштирок этган спортчилар, мураббийлар ва делегация вакиллари Ислом Каримов номидаги Тошкент халқаро аэропортида тантанали кутиб олинди.
Шундан сўнг Токио-2020 Паралимпиадаси қаҳрамонлари махсус автобусларда шаҳримизнинг марказий кўчалари бўйлаб Мустақиллигимизнинг 30 йиллик шодиёнаси арафасида қурилган «Янги Ўзбекистон» боғига етиб борди. Тантанали маросимнинг асосий қисми ушбу боғда ташкил этилди.
Тадбирда Ўзбекистон Республикаси Бош вазири Абдулла Арипов ҳамда Ўзбекистон Республикаси Олий Мажлиси Қонунчилик палатаси спикери Нурдинжон Исмоилов иштирок этиб, Паралимпиячиларимизни қўлга киритилган улкан муваффақият билан табрикалди. Шундан сўнг Ўзбекистон халқ шоири Сирожиддин Саид ўз шеъри билан Паралимпиячиларимизни қутлаган бўлса, Ўзбекистон халқ артисти Ёдгор Саъдиев ва Ўзбекистонда хизмат кўрсатган артист Раъно Шодиева ҳам ўзларининг илиқ тилакларини билдириб ўтди.
Маросимда спортчиларимиз номидан Паралимпиада чемпионлари пара-таэквондочи Гулжаной Наимова, пара-дзюдочимиз Учқун Қуронбоев сўзга чиқиб, Президентимиз томонидан берилаётган эътибордан мамнун эканликларини, давлатимиз раҳбарининг қўллаб-қувватлашидан мотивация олишларини айтиб ўтди.
Шундан сўнг Токио-2020 Паралимпия ўйинлари ғолибларига Президент совғалари – олтин медаль эгаларига «Таҳое» автомобили ва Тошкент шаҳридан 3 хонали уй, кумуш медаль эгасига «Траверсе» автомобили ва 2 хонали уй, шунингдек бронза медаль эгаларига «Траилблазер» автомобили ва 1 хонали уй калитлари топширилди. Якунда Ўзбекистон Республикаси Маданият вазири, Ўзбекистон халқ артисти Озодбек Назарбековнинг қўшиғи ва мушакбозлик билан тантанавор тадбирга чиройли якун ясалди, деб хабар беради Миллий олимпия қўмитаси матбуот хизмати.
Эслатиб ўтамиз, ортда қолган Токио-2020 Паралимпия ўйинларида делегациямиз 8 та олтин, 5 та кумуш ва 6 та бронза медалларини жамғариб, 162 мамлакат орасида 16-ўринни эгаллади.