Энди қиймати 100 млн сўмгача бўлган тайёр заргарлик буюмларини йўловчи божхона декларациясини тўлдирмасдан олиб чиқиш мумкин.
Жисмоний шахслар қиймати 100 млн сўмгача бўлган тайёр заргарлик буюмларини йўловчи божхона декларациясини тўлдирмасдан, 100 млн сўм ва ундан ортиқ бўлганларини йўловчи божхона декларацияси асосида Ўзбекистон Республикаси божхона ҳудудидан ташқарига олиб чиқишлари мумкин. Бу ҳақда Божхона қўмитаси хабар берди.
Аввалги тартиб бўйича қиймати 5 минг долларгача бўлган тайёр заргарлик буюмларини йўловчи божхона декларациясини тўлдирмасдан Ўзбекистондан олиб чиқиш мумкин эди.
Президентнинг 2022 йил 23 декабрдаги ПҚ-452-сон қарорида белгиланган тартибга кўра, заргарлик буюмларини ишлаб чиқарувчи якка тартибдаги тадбиркорлар заргарлик буюмларини йўловчи божхона декларациясини тўлдирган ҳолда, маълумотларни Ташқи савдо операцияларининг ягона электрон ахборот тизимига киритмасдан Ўзбекистон Республикаси божхона ҳудудидан ташқарига тижорат мақсадларида олиб чиқиши мумкин.
Бундан ташқари, 2023 йил 1 февралдан бошлаб, аффинаж корхоналари ва заргарлик буюмларини ишлаб чиқарувчилар:
- қимматбаҳо металларни ва таркибида қимматбаҳо металлар мавжуд бўлган хомашёни божхона ҳудудида қайта ишлаш божхона режимига жойлаштиришда;
- божхона ҳудудида қайта ишлаш божхона режимига жойлаштирилган қимматбаҳо металларни ва таркибида қимматбаҳо металлари мавжуд бўлган хомашёни қайта ишлаш маҳсулотларини Ўзбекистон Республикаси божхона ҳудудидан ташқарига олиб чиқишда махсус турдаги товарларни экспорт ва импорт қилиш учун лицензия олиш мажбуриятидан озод этилди.
2026 йил 1 январга қадар марварид, олмос, қимматбаҳо ва ярим қимматбаҳо тошларга импорт божхона божлари 0 фоиз этиб белгиланди.
