Бу ҳақда Украина Президенти Владимир Зеленский душанба, 8 декабрь куни кечқурун журналистларга маълум қилди. Матбуот анжумани Зеленскийни Лондондан Брюсселга олиб кетган самолётда бўлиб ўтди.
“28 банд бор эди, энди 20 та қолди. Бу йўналишни ўзгартирдик ва мутлақо очиқ-ойдин Украинага қарши бўлган бандлар олиб ташланди. Америкаликлар одатда муросага келиш тарафдори. Албатта, ҳудуд билан боғлиқ мураккаб масалалар мавжуд. У ерда ҳали муросага келинмаган”, дея Зеленскийнинг WhatsApp орқали журналистларнинг саволларига жавобанини келтириб ўтади "Интерфакс-Украина".
Украина ҳудудларини бериш ниятида эмас
Журналистлар билан суҳбатда Зеленский Украинанинг мамлакат конституциясига ҳам, халқаро ҳуқуққа ҳам кўра ўз ҳудудларини беришга ҳаққи йўқлигини таъкидлади. “Россия, албатта, биздан ҳудуддан воз кечишимизни талаб қилмоқда. Биз ҳеч нарсадан воз кечишни истамаймиз – биз айнан шу учун курашяпмиз”, дея Украина Президентининг сўзларидан иқтибос келтирди “Суспiльне”.
Нашрнинг ёзишича, Зеленский хавфсизлик кафолатлари масаласига ҳам тўхталди. “Биз энг кучли хавфсизлик кафолатларини АҚШдан олишимиз мумкин. Албатта, агар бу Будапешт меморандуми бўлмаса, бўш ваъдалар бўлмаса, агар улар АҚШ Конгрессида овозга қўйилса”, деди у.
Янги режа 9 декабрь куни АҚШга тақдим этилади
Зеленскийнинг сўзларига кўра, Украина томони тинчлик режаси устидаги ишни 9 декабрь куни кечқурун якунлайди ва кейин уни АҚШга тақдим этади. “Маслаҳатчилар [Украина Миллий хавфсизлик ва мудофаа кенгаши котиби] Рустем Умеров томонидан тақдим этилган режанинг сўнгги версияси устида ишлайди. Европалик маслаҳатчилар Украина билан. Менимча, режа эртага тайёр бўлади, биз уни яна бир бор кўриб чиқамиз ва кейин уни АҚШга юборамиз”, дея Зеленскийнинг сўзларидан иқтибос келтиради “РБК-Украина”.
4-6 декабрь кунлари Украина Миллий хавфсизлик ва мудофаа кенгаши котиби Рустем Умеров ва Украина Қуролли кучлари Бош штаби бошлиғи генерал Андрий Гнатовдан иборат Украина делегацияси Майамида АҚШ вакиллари билан музокаралар олиб борди. Америка томонидан Президент Дональд Трампнинг махсус вакили Стивен Уиткофф ва Оқ уй раҳбарининг куёви Жаред Кушнер қатнашди. Музокараларнинг учинчи кунида Зеленский уларга қўшилди ва унинг сўзларига кўра, “узоқ ва мазмунли телефон суҳбати” ўтказди, деб хабар берди dw.com.
