Шараға шығармашылық зиялы қауым өкілдері, қоғам қайраткерлері, бұқаралық ақпарат құралдарының өкілдері және кең жұртшылық қатысты.

“Янги Ўзбекистон” газеті редакциясы шығармашылық ұжымы дайындаған бұл кітап Президент Шавкат Мирзияевтың 2025 жыл барысындағы сан қырлы мемлекеттік және саяси қызметін қамтитын ауқымды жинақ саналады.

Басылымда мемлекеттік басқару, халықаралық дипломатия, экономикалық реформалар, экологиялық тұрақтылық, әлеуметтік қорғау, ғылым-білім және мәдениет салаларында атқарылған жұмыстар, фотосуреттер, құжатты деректер және талдау шолулар негізінде баяндалған.

Тұсаукесерде сөз сөйлегендер кітапта Жаңа Өзбекстанның дамуы, мемлекет басшысының халықпен байланысы, аймақтарда жүргізіліп жатқан өзгерістер мен елдің халықаралық аренадағы беделін арттыруға бағытталған бастамалар жүйелі түрде көрініс тапқанын атап өтті.

Журналистер одағының төрағасы Шухрат Ориповтың айтуынша, бұл кітап мемлекет басшысының халықтың мұң-мұқтажымен өмір сүргенін, ел дамуы мен адам қадірі жолындағы жанкешті қызметін көркем-публицистикалық рухта ашып көрсетеді.

— Бұл шығарма арқылы оқырман тек саяси үдерістерді ғана емес, сонымен бірге ел дамуының артында тұрған орасан еңбек, табандылық пен жауапкершілікті де сезіне алады, — деді Шухрат Орипов.

«Янги Ўзбекистон» және «Правда Востока» газеттері редакциясының бас редакторы Салим Донияровтың айтуынша, кітапты шығару идеясы оқырмандар мен қоғам өкілдерінің өтініштері негізінде қалыптасқан.

— Бұл идея кең жұртшылықтың идеясы десек артық болмайды. Оқырмандарымыз бен тұрақты жазылушыларымыздың үздіксіз өтініштері бізге мұндай кітаптарды міндетті түрде жинақтау қажеттігін ұқтырды, — деді Салим Донияров.

Тұсаукесер барысында атап өтілгендей, 2025 жыл ел дамуы үшін маңызды кезең болды. Атап айтқанда, жалпы ішкі өнім көлемі тарихта алғаш рет 145 миллиард доллардан асып, алтын-валюта қоры 60 миллиард доллардан жоғары көрсеткішке жеткені айтылды.

Кітапта тек сандар мен статистикалық мәліметтер ғана емес, олардың артындағы жүйелі реформалар, аумақтардағы мәселелердің шешімі және мемлекеттік басқарудағы жаңа жанасулар да талдамалық негізде көрсетілген.

Шара қатысушылары «Юрт қайғусида 365 кун» кітабы саясаттанушылар, тарихшылар, зерттеушілер, журналистер, студент-жастар және Жаңа Өзбекстандағы реформалар үдерісін терең зерттеуге қызығушылық танытатын қалың оқырман қауым үшін маңызды дереккөз болатынын атап өтті.