Муҳим археологик топилма Хоразм Маъмун академияси археологик экспедицияси томонидан дала тадқиқотлари давомида қайд этилди.

Ёдгорликда тошдан қурилган яшиксимон 19 та қабр мавжудлиги қайд этилган. Уларда ғужанак ҳолатда дафн этилган жасадлар топилган. Шунингдек, қабрлардан турли дафн анжомлари, жумладан, бронза буюмлар ва мунчоқлар ҳам топилган.

Топилган мажмуа Хоразмнинг қадимги тарихини ўрганишда муҳим аҳамият касб этади. Чунки бундай дафн ёдгорликлари минтақанинг қадимги аҳолиси маданияти, дафн маросимлари, ижтимоий тасаввурлари ҳамда турли ҳудудларда яшаган аҳоли ўртасидаги алоқалар ҳақида муҳим маълумотлар беради.

Дастлабки таҳлиллар дафн маросими ва топилмаларнинг айрим турлари Жанубий Қозоғистоннинг Сирдарё ҳавзаси ҳудудларида қайд этилган дафн иншоотлари билан муайян ўхшашликларга эга эканини кўрсатмоқда.

Бу каби ўхшашликлар бронза даврида Марказий Осиёнинг турли ҳудудларида яшаган аҳоли ўртасида маданий алоқалар ва умумий анъаналар мавжуд бўлган бўлиши мумкинлигидан далолат беради. Шу билан бирга, ёдгорликнинг аниқ санаси ва маданий мансублиги ҳақидаги якуний хулосалар археологик материаллар комплекс тарзда ўрганилгандан сўнг чиқарилади.

Айни пайтда академия мутахассислари экспедиция давомида қўлга киритилган материалларни дастлабки қайта ишлаш ва ҳужжатлаштириш ишларини олиб бормоқда.

Келгусида дафн иншоотлари, антропологик материаллар ва дафн анжомлари батафсил ўрганилиб, зарур лаборатория тадқиқотлари амалга оширилади. Олинган натижалар ёдгорликнинг санасини аниқлаштириш ҳамда унинг Хоразм ва унга туташ ҳудудлардаги бронза даври археологик маданиятлари тизимидаги ўрнини белгилаш имконини беради.