Дар оғози суҳбат Рашид Мередов ба сарвари давлати мо салому дуруд ва таманниёти неки Президенти Туркманистон Сердар Бердимуҳамедов ва Пешвои миллии халқи туркман, Раиси Халқ Маслаҳатӣ Гурбонгулӣ Бердимуҳамедовро расонд.
Зимни мулоқот масъалаҳои мубрами рушди минбаъдаи муносибатҳои дӯстӣ, ҳусни ҳамҷаворӣ ва шарикии стратегии Ӯзбекистон ва Туркманистон баррасӣ шуданд.
Ҷонибҳо аз рушди босуръати робитаҳо дар тамоми сатҳҳо изҳори қаноатмандӣ карданд. Ба наздикӣ миёни ду кишвар механизми нодир – Шӯрои олии шарикии стратегӣ таъсис дода шуд. Ҳаҷми гардиши мол ва ҳамлу нақли бор мунтазам афзоиш меёбад. Минтақаи савдои наздисарҳадии «Шават – Дашоғуз» низ бомуваффақият фаъолият мекунад.
Аҳамияти иҷрои саривақтии тавофуқоти дар сатҳи олӣ ҳосилшуда, инчунин омодагии ҳамаҷониба ба Форуми сеюми минтақаҳо ва Рӯзҳои фарҳанг ва синамои Ӯзбекистон, ки дар шаҳрҳои Туркманистон баргузор мешаванд, таъкид гардид.
Ҳамчунин, оид ба масъалаҳои ҳамкории минтақавӣ табодули афкор сурат гирифт.
