Теҳрон, дар навбати худ, ба Вашингтон 10 талабот пешниҳод намуд, ки президенти Амрико онҳоро ҳамчун асоси корӣ барои музокироти минбаъда арзёбӣ кард.
Президенти ИМА дар шабакаи иҷтимоии Truth Social хабар дод, ки бо дархости мақомоти Покистон ва ба шарти пурра боз шудани танги Ҳурмуз ба оташбаси дуҳафтаина розӣ шудааст.
Ба гуфтаи Трамп, пешниҳодҳои аз ҷониби Эрон пешниҳодшуда метавонанд асоси созишномаи сулҳи дарозмуддат гарданд.
Шӯрои олии амнияти миллии Эрон низ розигии худро ба оташбас тасдиқ кард. Изҳороти шӯро аз ҷониби вазири корҳои хориҷии кишвар Аббос Арақчӣ нашр гардид. Ҳамзамон, Теҳрон таъкид кард, ки ҷумҳурӣ омодагии пурраи низомии худро нигоҳ медорад.
Аз ҷумлаи талаботи асосии Эрон:
ӯҳдадории ҳамла накардан;
нигоҳ доштани назорат бар танги Ҳурмуз;
розигӣ ба ғанисозии уран;
бекор кардани таҳримҳои аввалия ва дуюмдараҷа;
қатъи амал кардани баъзе қарорҳои Шӯрои Амнияти СММ ва МАГАТЭ;
пардохти ҷуброн ба Эрон;
хориҷ кардани нерӯҳои низомии Амрико аз минтақа;
қатъи амалиёти ҷангӣ дар ҳамаи самтҳо, аз ҷумла муноқиша бо «Ҳизбуллоҳ» дар Лубнон.
Сарвазири Покистон Шаҳбоз Шариф, ки қаблан пешниҳоди оташбаси дуҳафтаинаро ироа карда буд, изҳор намуд, ки режими оташбас фавран ба амал медарояд. Ба гуфтаи ӯ, музокироти байни Эрон ва ИМА 10 апрел дар Исломобод баргузор мегардад.
Вазорати корҳои хориҷии Ироқ аллакай аз ин созишнома истиқбол намуда, умедворӣ изҳор кард, ки он ба коҳиши таниш ва таҳкими субот дар минтақа мусоидат хоҳад кард.
Дар пасманзари эълони оташбас, нархи ҷаҳонии нафт якбора поин рафт. Қимати Brent, ки 7 апрел дар ҳудуди 107–110 доллар барои як баррел қарор дошт, пас аз эълони созишнома то тақрибан 94 доллар коҳиш ёфт, ва WTI то 96,8 доллар поин фаромад.
