Өзбекстан Президентінің 2024 жылғы 18 қарашадағы қаулысына сәйкес, Әндіжан облысын әлеуметтік-экономикалық тұрғыда дамыту, инвестициялық және кәсіпкерлік ортаны одан әрі жақсарту бойынша нақты шаралар белгіленген болатын. Атап айтқанда, биыл облысқа 3,1 млрд доллар инвестиция тарту, 1,5 млрд долларлық экспортты қамтамасыз ету, 305 мың адамды жұмыспен қамту және 32 мыңнан астам отбасын кедейліктен шығару көзделген.

Жыл басынан бері өңірде жалпы құны 1 млрд доллар болатын жаңа өндіріс қуаттары мен 344 сауда және қызмет кешені іске қосылды. Сондай-ақ 2,5 млрд долларлық жобалар қолға алынды. Алты ай ішінде 850 млн доллар инвестиция тартылып, экспорт көлемі 465 млн долларды құрады.

Сәуір айында Мемлекет басшысының облысқа сапары өңір дамуына қосымша серпін берді. Жақында ғылыми сарапшылар мен белсенді кәсіпкерлердің қатысуымен «Реформалар штабы» құрылып, экономикалық және әлеуметтік бағыттар бойынша жаңа ұсыныстар дайындалды.

Таныстырылым барысында жауапты мамандар олардың негіздемелері мен тиімділігі жөнінде ақпарат берді.

Мысалы, Германия, Түркия және Жапониядан робот-технологияларды әкеліп, 40 млн доллар инвестиция есебінен инновациялық клиника салу жоспарланып отыр. Сондай-ақ елшіліктер қолдауымен Италиядан 20 млн еуро көлемінде қаржы тартып, агрокластер құру, Германиядан 25 млн еуроға заманауи агрологистика кешенін салу көзделген. Бұдан бөлек, «Ханабад» қаласы, «Хужаабад» және «Булоқбоши» аудандарында туристік нысандарды дамыту бойынша 30-дан астам жоба ұсынылған.

Жалпы алғанда, құны 1 млрд 100 млн долларды құрайтын қосымша жобалар пакеті қалыптастырылған. Олардың нәтижесінде 22 мың жаңа жұмыс орны ашылып, 200 млн долларлық қосымша экспорттық мүмкіндік пайда болады.

Мемлекет басшысы әрбір қала мен ауданға жеке көзқараспен қарау, жаңа жобаларды инвестициясы аз аймақтарға орналастыру, жұмыссыз және мұқтаж отбасыларды оқытып, жұмысқа орналастыру, сондай-ақ махаллаларды қылмыстан таза аймаққа айналдыру бойынша тапсырмалар берді.