Ақпараттық технологиялар саласында 2030 жылға дейін 300 мың жұмыс орнын құру жөніндегі мақсатқа биылдың өзінде қол жеткізілді. Енді цифрлық экономиканың жаңа бағыттарын дамыту есебінен 2030 жылға дейін тағы 500 мың жұмыс орнын құру міндеті қойылып отыр.
Ол үшін жастарды оқытудан бастап, кәсіби дағдыларын растау мен жұмысқа орналастыруға дейінгі үдерістерді қамтитын бірыңғай цифрлық білім беру экожүйесін қалыптастыру қажет. Таныстырылымда 2030 жылға дейін 5,5 миллион жасты дәстүрлі және қашықтан оқытуға бағытталған тәсілдер қарастырылды.
Мектеп оқушыларына арналған «Әл-Хорезми мұрагерлері» және «Бес миллион жасанды интеллект көшбасшысы» жобаларын кеңейту, жоғары оқу орындары мен жекеменшік оқу орталықтарының мүмкіндіктерін біріктіру көзделіп отыр.
Мемлекет басшысы робототехника, компьютерлік ойындар әзірлеу, стартаптар және басқа да перспективалы бағыттар бойынша жыл сайын 1 миллион жасты оқыту міндетін жүктеді. Ол үшін ұлттық жаттықтырушылар корпусын қалыптастыру, онлайн білім беру платформалары мен қысқа мерзімді цифрлық курстарды жедел іске қосу, ғылыми зерттеулерді дамытып, олардың нәтижелерін тәжірибеге кеңінен енгізу қажеттігі атап өтілді.
Таныстырылымда жоғары оқу орындарында даярланатын мамандардың біліктілігін технологиялар мен еңбек нарығындағы өзгерістерге бейімдеу мәселелері де қаралды. Жасанды интеллект, микросхемаларды жобалау, дрон технологиялары және компьютерлік ойындар әзірлеу сияқты бағыттар бойынша білім беруді дамыту, студенттердің практикалық жобаларға қатысуын кеңейту ұсынылды.
Сондай-ақ информатика мұғалімдерінің жасанды интеллект бойынша білімін жетілдіру және оларды сертификаттау, жоғары оқу орындары студенттерінің халықаралық цифрлық білім беру курстарына қол жеткізу мүмкіндіктерін кеңейту мәселелері талқыланды. Ферғана тәжірибесі негізінде iOS әзірлеушілерін даярлау орталықтарын құру және жекеменшік оқу орталықтары үшін менторлар даярлау жөніндегі ұсыныстар мақұлданды.
Ғылыми зерттеулер мен әзірлемелерді білім беру жүйесімен ұштастыруға да назар аударылды. Атап айтқанда, жоғары оқу орындарында орнатылған жүйелер, микроэлектроника және заттар интернеті салалары бойынша мамандар даярлау, инженерлік әзірлемелер мен зерттеу зертханаларының жұмысын қолдау жөнінде ұсыныстар айтылды.
Жастардың алған білімін еңбек нарығында қолдануына мүмкіндік жасау үшін «Цифрлық жастар» платформасын дамыту жоспарлары да қаралды. Платформада білім, дағдылар, тіл меңгеру деңгейі мен сертификаттар туралы мәліметтерді жинақтау, жастарға лайық бос жұмыс орындарын ұсыну және олардың жұмыспен қамтылуын бақылау көзделіп отыр.
Цифрлық білім беру саласына жаһандық технологиялық компанияларды кеңінен тарту қажеттігі атап өтілді. Былтыр осы бағытта 22 миллион доллар грант тартылған. Жүйелі ынтымақтастық арқылы бұл көрсеткішті биыл жыл соңына дейін 60 миллион долларға, ал 2030 жылға қарай жылына 100 миллион долларға жеткізу тапсырылды.
Биыл тартылатын грант қаражатының жартысын цифрлық білім беруге, қалған жартысын біліктілікті арттыру бағдарламаларына және шалғай аймақтарда цифрлық білім беру орталықтарын құруға бағытталатын болды. Бұл орталықтар жасанды интеллект, робототехника және бағдарламалауды үйретуге арналған заманауи жабдықтармен қамтамасыз етіледі.
Мемлекет басшысы цифрлық білім беруде оқыту ауқымымен қатар, білім сапасы мен оның жұмыспен қамтуға ықпалы да негізгі өлшем болуы керектігін атап өтті. Жауапты тұлғаларға белгіленген межеге нақты бағдарламалар арқылы қол жеткізу, өңірлердегі мүмкіндіктерді кеңейту, жекеменшік сектор және халықаралық серіктестермен жұмысты күшейту жөнінде тапсырмалар берілді.
Сондай-ақ Халықаралық цифрлық технологиялар орталығының жұмысын жолға қою барысы туралы ақпарат ұсынылды.
