Өзбекстанда халық қауіпсіздігі қастерлі құндылық ретінде қорғалады. Әртүрлі қатерлер туындап жатқан қазіргі заманда төтенше жағдайлар органдарының жұмыс жүйесін жетілдіру қажеттігі туындауда.
Салада 30-дан астам заңнамалық құжат қабылданғанына қарамастан, әлі күнге дейін төтенше жағдайлардың алдын алу және олардан қорғану бойынша кешенді бағдарлама жоқ. Бұдан 16 жыл бұрын қабылданған «Өрт қауіпсіздігі туралы» заң да ескірген.
Сондықтан төтенше жағдайларды алдын ала бағалап, жедел әрі проактивті жұмыс істейтін жүйе құру міндеті қойылды.
Таныстырылымда жауапты тұлғалар осы бағыттағы талдау нәтижелерін, бар мәселелер мен ұсыныстарын баяндады.
Қазіргі таңда төтенше жағдайлардың алдын алу бойынша профилактикалық жұмыстар негізінен мемлекеттік мекемелерде жүргізілуде. Алайда мұндай оқиғалардың 70 пайыздан астамы халықтың тұрғылықты үйлерінде ақаулы, пайдалану мерзімі өтіп кеткен газ және электр жабдықтарын қолдану, сондай-ақ қауіпсіздік мәдениетінің сақталмауы салдарынан туындап отыр.
Осы себепті жүйелі жұмысты тікелей махаллаларда ұйымдастырып, төтенше жағдайлардың алдын алу және қауіпсіздік мәдениетін арттыру шараларымен әрбір махалла, әрбір көше мен әрбір шаңырақты қамту қажеттігі атап өтілді.
Салада цифрлық технологиялар мен заманауи техникалық құралдарды пайдалану деңгейі әлі де төмен, бұл бағыттағы жұмыстар заман талабына толық сай келтірілмеген.
Сол себепті салада цифрлық инфрақұрылым қалыптастыру, төтенше жағдай туралы хабар беруден бастап оны толық жоюға дейінгі барлық процестерді цифрландыру, сондай-ақ жаңа жұмыс тетіктерін енгізу жөнінде тапсырма берілді.
Төтенше жағдайларды дер кезінде жою үшін заманауи техника мен жабдықтарды көбейту, оларды елімізде өндіруді жолға қою қажеттігі көрсетілді.
Соңғы жылдары еліміздегі барлық салалар трансформациялануда, құрылыс индустриясы да өзгеруде. Барлық салада «жасыл» технологиялар кеңінен енгізілуде. Осы арқылы пайда болуы мүмкін жаңа сипаттағы техногендік қатерлерді бағалап, олардың алдын алу үшін заманауи кадрларды даярлау, қайта даярлау және біліктілігін арттырудың үздіксіз жүйесін құрудың өзектілігі атап өтілді.
Осыған байланысты Төтенше жағдайлар министрлігі академиясында дуалды білім беру жүйесін енгізу және біліктілікті арттыру орталығын құру, кәсіби құтқарушыларды даярлау, оқыту және ғылыми зерттеулер ауқымын кеңейту тапсырылды.
