Бұл жолғы сапар «Шайхантаур» және «Чиланзар» аудандарын қамтыды. Екі ауданның арасын «Бунёдкор» көшесі байланыстырып тұр. Аталған орталық көшеде өнер мен мәдениет мекемелері, түрлі ұйымдар, көпқабатты үйлер, супермаркеттер мен мейрамханалар орналасқан. Осы әлеуетті тиімді пайдалану мақсадында 1,5 шақырымдық бөлігі қызмет көрсету және гастротуризм көшесіне айналдырылды.

Мемлекет басшысы қоғам өкілдерімен бірге жаңа келбетке енген аймақты аралап, ондағы жағдаймен танысты.

Жол бойы толық абаттандырылып, ландшафтық дизайн, субұрқақтар мен түрлі шамдар аумақтың келбетін ажарлай түскен. Адамдардың серуендеп, тамақтанып, мазмұнды демалуына барлық жағдай жасалған.

Осы мақсатта көшедегі 90 кәсіпкерлік субъектісі тәулік бойы жұмыс істеу тәртібіне көшірілді, олардың 45-і жаңадан құрылып, 500-ден астам адам тұрақты жұмыспен қамтамасыз етілді.

Көшеге іргелес жатқан «Камолон», «Жаңа Камолон» және «Камолон дарбаза» махаллаларында шамамен 18 мың адам тұрады. Өзгерістер, ең алдымен, осы тұрғындардың өмір сапасына оң әсер етеді. Сонымен қатар, бұл аймаққа жылына 255 мыңға жуық турист келуде. Қазіргі жағдайды ескерсек, бұл көрсеткішті 1 миллионға дейін жеткізуге мүмкіндік бар.

Соңғы жылдары Өзбекстанда туризм саласында 2 мыңнан астам жаңа кәсіпкер өз ісін бастаған. Былтыр шетелдік туристердің келуі алғаш рет 10 миллионнан асты. Өңірлерде туризм мен қызмет инфрақұрылымы белсенді дамып келеді. Туристік ауылдар, қонақ үйлер мен гастрономиялық көшелерге қолдау көрсетілуде.

Бүгінгі таңда Ташкенттің «Миробод», «Алмазар», «Чиланзар», «Яккасарай», «Янгихаёт» аудандарында осындай гүлденген, адам көп шоғырланатын көшелер пайда болуда. «Бунёдкор» көшесі де осы туризм белдеуінің маңызды бөлігіне айналады. Жалпы, Ташкентте 26 көшені тәулік бойы жұмыс істейтін белсенді аймаққа айналдыру, тәулік бойы қызмет көрсететін 1000 сауда нүктесін ашу жоспарланған.

Сапар барысында заманауи аялдамалар мен автотұрақтар жобаларының таныстырылымы да өтті.