Бұл кешен Мемлекет басшысының бастамасымен ұлы мұхаддис бабамыздың ислам әлеміндегі жоғары орны мен беделіне сай қайта жаңғыртылды. Мұнда келетін зияратшылар үшін барлық қолайлы жағдай жасалған.
Атап айтқанда, кешен жанынан туризм орталығы ашылды. Жанындағы 15 гектар аумақта заманауи инфрақұрылым қалыптастырылып, жайлы қонақ үйлер, қызмет көрсету және сервис нысандары салынды. Оның ішінде 1 төрт жұлдызды, 2 үш жұлдызды қонақ үй, 176 орындық 22 отбасылық қонақ үй және автотұрақ бар. Барлық нысандар инженерлік-коммуникациялық желілермен толық қамтамасыз етіліп, аумағы абаттандырылған.
Нәтижесінде, бұрын күніне 12 мың адамды қабылдаған кешеннің сыйымдылығы енді тәулігіне 65 мың зияратшыға дейін жетті.
Кешеннің өзі Самарқандтың, Жаңа Өзбекстанның көркіне айналды. Жалпы аумағы 45 гектарды құрайды. Мұнда 10 мың адамға арналған үлкен мешіт, әкімшілік ғимараты және 154 бағаналы, ұлттық нақыштағы айбынды терасса салынған.
Кешен құрамында ең озық ақпараттық технологиялар негізінде 9 павильоннан тұратын бірегей инновациялық музей бой көтерді. Онда ислам әлемінде «мұхаддистер сұлтаны» атанған Имам Бұхаридің өмірі мен ғылыми мұрасы, ислам өркениетінің дамуына қосқан үлесі кеңінен таныстырылған. Сонымен қатар музейде Құран Кәрімде аты аталған 25 пайғамбардың тарихы, Мұхаммед пайғамбардың (с.ғ.с.) шежіресі, Мекке мен Мәдинадағы өмірі, хадистердің жинақталуы мен жазылуы туралы мәліметтер берілген.
Кешенде 14 көгілдір күмбез бен биіктігі 75 метр болатын 4 мұнара оған ерекше көрік беріп тұр.
Мемлекет басшысы туризм орталығы мен мешіттегі жасалған жағдайлармен танысты.
Белгілі болғандай, бір жарым мың жылдық ислам тарихы мен ғылымын елімізден шыққан ұлы ғұламаларсыз елестету мүмкін емес. Бұл ақиқатты жақында ашылған Өзбекстандағы Ислам өркениеті орталығы тағы бір мәрте дәлелдей түсті.
Жалпы мұсылман әлемінде хадис ілімі туралы сөз қозғалғанда, ең алдымен біздің өлке аталады. Өйткені Имам Бұхари мен Имам Термизи сияқты ұлы ғалымдар осы топырақтан шыққан.
Атап айтқанда, Имам Бұхаридің «Сахих әл-Бұхари» кітабы әлемде мойындалған ең беделді алты хадис жинағының бірі. Ғалым 10 жасынан бастап хадис ілімін меңгеріп, 20-дан астам еңбек жазған. Бұл еңбектер бүгінге дейін ислам үмбетіне қызмет етіп келеді.
Мемлекет басшысы Самарқандқа келген сайын кешен құрылысының барысымен танысып, бұл орын тек зиярат емес, ғылым-білім, тәрбие және тағылым ордасы болуы керектігін атап өткен болатын.
– Бұл бірегей құрылыс Жаңа Өзбекстанның зор мүмкіндіктерін айқын көрсетеді. Зиярат орны халқымыз үшін де, бүкіл мұсылман әлемі үшін де игілік пен руханият тарататын қасиетті мекенге айналады деп сенемін. Бұл жерге келген әрбір адам, әсіресе жастар, ислам дінінің шынайы мәнін түсініп, дұрыс жолдан таймайды, – деді Мемлекет басшысы.
Сондықтан кешенде рухани-ағартушылық жұмыстарды кеңейту, оны шынайы тәрбие мен тағылым мектебіне айналдыру, имам-хатибтер мен махалла белсенділері үшін біліктілікті арттыру бағдарламаларын күшейту қажеттігі атап өтілді.
Барлық жұмыстардың аяқталғанын ескере отырып, жаңа салынған зәулім мешітте Айт намазын өткізу ұсынылды. Бұл мұсылман қауымының, бүкіл халықтың көңілінен шығатын игі іс әрі халқымызға лайық Рамазан сыйы болатыны айтылды.
Сонымен, Мемлекет басшысының Самарқанд облысына жасаған сапары аяқталды.
