Мемлекет басшысының қаулысына сәйкес, өткен жылы елімізде ақида ғылымының негізін қалаушы Абу Мансур Матуридидің 1155 жылдығы кең көлемде атап өтілді. Осыған орай, Самарқанд қаласындағы «Чокардиза» зират аумағында Имам Матуридий кешенін қайта жөндеу және абаттандыру жұмыстары қолға алынған болатын.
Қазіргі таңда кешен мен оның айналасында құрылыс және абаттандыру жұмыстары жалғасуда. Жалпы аумағы 10,2 гектарды қамтитын жерде Имам Матуриди кешені қайта құрылып, 250 орындық мешіт, кіреберіс портал, ғылыми орталық, кітапхана, музей және автотұрақ салынып жатыр.
Сонымен қатар, құрылыс барысында «Чокардиза» зиратында ұлы фәкіһ Бұрханиддин Марғинанидің жерленген орны анықталып, сол жерде кесене салынуда.
Осы жерде ғұламалардың ізгі амалдары еске алынып, олардың құрметіне Құран оқылды.
Мемлекет басшысы құрылыс жұмыстарымен танысып, бұл орынның әлемдік мұсылмандар үшін маңызды зиярат орны екенін атап, заманауи талаптарға сәйкес жағдай жасау қажеттігін айтты.
– Кешенге келген адам алдымен Имам Матуриди бабамыздың ғылыми-рухани мұрасы, ислам әлеміндегі мәртебесі туралы нақты түсінікке ие болуы керек, ал маманның ағартушылық көзқарастары бүгінгі күнге де өзекті екенін сезінуі қажет, – деді Президент.
Сондай-ақ, құрылыс жұмыстарының сапалы және уақытылы орындалуын қамтамасыз ету, аймақтағы жасыл аумақтарды көбейту жөнінде нұсқаулар берілді.
