Іс-шараға АҚШ Мемлекеттік хатшысы Марко Рубио, АҚШ Президентінің арнайы өкілі Сержио Гор және жетекші америкалық компаниялар мен банктердің өкілдері де қатысты.
Мемлекет басшысы өз сөзінде Өзбекстан мен АҚШ арасындағы ынтымақтастықтың жаңа мүмкіндіктері ғасырлар бойы халықтарды, мәдениеттер мен сауда жолдарын тоғыстырған Самарқанд қаласында талқыланып жатқанының символдық мәні бар екенін атап өтті.
Бүгінде Өзбекстан мен АҚШ арасындағы қарым-қатынастар сапалық тұрғыдан жаңа кезеңге көтерілгені, бұл, ең алдымен, АҚШ Президенті Дональд Трамптың жеке назары мен қолдауының арқасында мүмкін болғаны айтылды.
Берік саяси серіктестік негізінде экономикалық байланыстарды одан әрі кеңейту қажеттігі атап өтілді.
Бұл ретте бірлескен жобалар мен бастамаларды ілгерілетуге елеулі үлес қосып отырған Америка – Өзбекстан іскерлік және инвестициялық кеңесі ерекше орын алады.
Мемлекет басшысы Өзбекстанда жүзеге асырылып жатқан ауқымды реформаларға тоқталды. Экономика өсіп, жаңа кәсіпорындар іске қосылып, жұмыс орындары ашылып, жастардың білім алу мүмкіндіктері кеңейіп келеді.
Сонымен қатар өнеркәсіпті одан әрі дамыту және заманауи инфрақұрылым құру үшін инвестиция тарту үдерісі озық технологияларды енгізу, білім мен тәжірибе алмасумен қатар жүруі қажет екені атап өтілді.
Бұл бағытта АҚШ бизнесімен ынтымақтастықтың мол тәжірибесі жинақталғаны айтылды. Қазіргі уақытта Өзбекстанда америкалық капиталдың қатысуымен жүздеген компания жұмыс істейді. Олармен өнеркәсіп, энергетика, көлік, ауыл шаруашылығы, білім беру және жаңа технологиялар салаларында ынтымақтастық жолға қойылған. Сонымен бірге Өзбекстан компаниялары да АҚШ экономикасына инвестиция сала бастады.
Маңызды минералдарды игеру және терең өңдеу арқылы жоғары технологиялық өнімдер өндіру, заманауи әрі тұрақты энергетика жүйесін дамыту, деректерді өңдеу орталықтарын құру, өнеркәсіпке, ауыл шаруашылығына, білім беру мен мемлекеттік басқаруға жасанды интеллект және цифрлық шешімдерді енгізу, сондай-ақ білім беру мен кадр даярлау ынтымақтастықты одан әрі кеңейтудің перспективалы бағыттары ретінде белгіленді.
Іскерлік және инвестициялық кеңестің бүгінгі отырысына тыңғылықты дайындық жүргізілгені атап өтілді. Нәтижесінде жалпы құны шамамен 12 миллиард доллар болатын 54 келісім мен перспективалы бастамадан тұратын топтама қалыптастырылды. Оларды жүзеге асыру үшін кешенді іс-қимыл бағдарламасы әзірленеді.
Кеңестің қызметін одан әрі жетілдіру үшін күш-жігер мен мүмкіндіктерді үш басым міндетті шешуге жұмылдырудың маңыздылығы атап өтілді.
Ең алдымен, АҚШ кәсіпкерлері үшін түсінікті әрі болжамды жағдай жасау қажет. Өзбекстанға келген инвестор әкімшілік рәсімдерге уақыт жұмсамай, өз бизнесін қысқа мерзімде бастау мүмкіндігіне ие болуы тиіс.
Осы мақсатта инвесторлармен жұмыс істеуде «Plug and Play» қағидатына негізделген жаңа тәсілге көшіп жатқаны айтылды. Оларға жер учаскесі, инфрақұрылымы дайын, рұқсат алу және құжаттарды рәсімдеу мәселелері шешілген жобалар ұсынылады.
Сонымен бірге өзбекстандық кәсіпкерлер де серіктес ретінде қатысып, инвестициялық тәуекелдердің бір бөлігін өз мойнына ала алады. Жаңадан құрылған Тікелей инвестициялар қоры да осындай жобаларға қатысады.
Келесі басым міндет ретінде экономиканың жаңа салаларын, сондай-ақ өнеркәсіп пен технологиялардың қарқынды дамуына ықпал ететін ірі орталықтарды бірлесіп қалыптастырудың маңыздылығы атап өтілді.
Кеңес екі ел арасындағы ұзақ мерзімді экономикалық серіктестіктің стратегиялық тетігіне айналуы тиіс екені айтылды. Осыған байланысты 2035 жылға дейінгі кезеңге арналған сауда-инвестициялық және технологиялық ынтымақтастық бағдарламасын әзірлеу ұсынылды.
Сонымен қатар кеңес жаңа бастамаларды әзірлеуге, жүйелі кедергілерді жоюға және ірі бірлескен жобаларды ілгерілетуге мүмкіндік беретін маңызды диалог алаңына айналуы қажет.
