Кездесуге АҚШ Экспорт-импорт банкінің президенті әрі басқарма төрағасы Джон Йованович, Халықаралық қаржылық даму корпорациясы (DFC) бас атқарушы директоры Бэн Блэк, АҚШ – Өзбекстан сауда палатасының төрайымы Кэролин Лэмм, сондай-ақ «Air Products», «Cove Capital», «Templeton Global Investments», «Boeing», «77 Construction», «BlackRock», «FLS», «Visa», «JP Morgan», «Meta», «GULF» және басқа да ірі корпорациялардың басшылары мен өкілдері қатысты.
Мемлекет басшысы бұл кездесу соңғы жылдары қалыптасқан игі дәстүрдің жалғасы екенін және америкалық бизнес өкілдерінің Өзбекстандағы қызметін кеңейтуге қызығушылығы артып келе жатқанын атап өтті.
Сондай-ақ экономикалық ынтымақтастық Өзбекстан мен АҚШ арасындағы стратегиялық серіктестіктің негізгі тіректерінің бірі екені айтылды.
Мемлекет басшысы екі ел арасындағы сауда-экономикалық байланыстарды одан әрі дамытуға бағытталған бірқатар басым бағыттарды айқындап берді.
Атап айтқанда, маңызды минералдық ресурстарды игеру және өңдеу, энергетика, металлургия, қаржы, жасанды интеллект, цифрлық технологиялар және басқа да салалардағы нақты жобаларды жүзеге асыру мәселелеріне айрықша назар аударылды.
АҚШ-тың ірі компанияларының жетекшілері Өзбекстанда инвесторлар үшін жасалған қолайлы жағдайларға жоғары баға беріп, Мемлекет басшысына ризашылықтарын білдірді. Сонымен қатар олар өздерінің нақты ұсыныстары мен алдағы жоспарларын таныстырды.
Кездесу соңында Өзбекстан мен АҚШ-тың жетекші компаниялары арасында екіжақты құжаттармен алмасу рәсімі өтті.
