Аталған іс-шара Мемлекет басшысының бастамасымен Өзбекстанда жасанды интеллект экожүйесін дамытуға бағытталған жүйелі саясатының аясында ұйымдастырылды.
Мемлекет көшбасшыларына цифрландыру мен жасанды интеллект технологияларын енгізу бағытында қол жеткізілген нәтижелер таныстырылды. Атап айтқанда, «Цифрлық үкімет» жүйесі, сондай-ақ көлік, кеден, салық, денсаулық сақтау, әлеуметтік қорғау, энергетика, геология, құрылыс және ауыл шаруашылығы салаларындағы цифрлық трансформация үдерістері жөнінде кеңінен мәлімет берілді.
Бұл бастамалардың мемлекеттік басқару тиімділігін арттырып, халықтың өмір сапасын жақсартуға қызмет етіп жатқаны атап өтілді.
Сонымен қатар, Өзбекстан мен Қазақстандағы стартаптарды қолдау және ілгерілетуге арналған экожүйе таныстырылды. Мемлекет басшылары «KPI-COM», «OSON», «DATOX» сынды перспективалы жобалардың жұмысымен танысып, олардың бастамашыларымен сұхбат құрды.
Ұлттық және халықаралық акселераторлар, соның ішінде «UZUM», «TBC Bank», «Aloqabank», «HUMO», «UZCARD» қызметі туралы да ақпарат ұсынылды.
Венчурлік инфрақұрылымды дамыту, жастар кәсіпкерлігін қолдау маңызды екені айтылды.
Банк саласының жетістіктері, атап айтқанда, цифрлық банк қызметтері мен заманауи төлем шешімдерінің дамуына назар аударылды.
Мемлекет басшыларына хакатон өткізу тұжырымдамасы және қатысушылардың түрлі салалардағы өзекті мәселелерді шешуге бағытталған жобалары таныстырылды.
Ашық пікір алмасу барысында жастардың бұл салаға қызығушылығының жоғары екені, сондай-ақ жас өрендердің шығармашылық әлеуеті мен жасанды интеллект технологияларын тәжірибеде қолдануға деген ынта-жігері жоғары бағаланды.
Сапар соңында Президенттер хакатон қатысушылары және стартап қауымдастығы өкілдерімен бірге естелік суретке түсті.
